Abduraxman tömür xitaygha xizmet körsetken weqede az dégende yette kishi ölgenliki melum

Muxbirimiz shöhret hoshur
2017-05-24
Élxet
Pikir
Share
Print
Uyghur rayonida arqa-arqidin yüz bériwatqan qarshiliqlardin kéyin, xitay qoralliq qisimlirining Uyghurlar olturaqlashqan rayonlarda charlash élip bériwatqan körünüsh. 2013-Yili 29-iyun, ürümchi.
Uyghur rayonida arqa-arqidin yüz bériwatqan qarshiliqlardin kéyin, xitay qoralliq qisimlirining Uyghurlar olturaqlashqan rayonlarda charlash élip bériwatqan körünüsh. 2013-Yili 29-iyun, ürümchi.
AFP

Tünügünki éniqlishimiz dawamida, xitayning bu yilliq memliketlik saqchi qehrimani, guma nahiyisining choda yéziliq saqchixana bashliqi abduraxman tömürning 2015-yili gumida yüz bergen "14-Féwral" weqeside xizmet körsetkenliki ashkarilan'ghan idi. Muxbirimizning ilgirilep téléfon ziyariti we tor xewer arxipliridin éniqlishi netijiside abduraxman tömür tilgha alghan mezkur weqening radiyomiz teripidin 2015-yili 16-féwral küni xewer qilin'ghan guma piyadiler kochisi weqesi ikenliki éhtimalliqi ashkarilandi. Xitay axbarati peqetla tilgha almighan mezkur weqe radiyomiz teripidin ashkarilan'ghan we weqede az dégende 7 kishi ölüp, 7 kishi yarilan'ghanliqi delillen'gen idi.

Biz abduraxman tömür yuqirida tilgha alghan 2015-yili yüz bergen 14-féwral weqesining qaysi weqe ikenlikini éniqlash üchün gumidiki herqaysi saqchixanilargha téléfon qilduq. Gumida weqening yéqinqi yillarda yüz bergenliki we da'irilerning weqeler heqqidiki uchurni qattiq kontrol qilghanliqi seweblik, saqchilar mezkur weqe heqqide melumat bérelmidi. Radiyomizning xitayche xewer arxipidiki 2015-yili 16-féwral küni élan qilin'ghan bir xewerde bayan qilinishiche, shu ay jüme yeni 13-féwral küni guma bazar ichide bir qanliq weqe yüz bergen, weqede az dégende 7 kishi ölgen we 7 kishi yarilan'ghan. Uyghur bölümimizning eyni kündiki bu heqtiki xewiride, weqening guma konabazar piyadiler kochisida yüz bergenliki, weqede az dégende yette kishi ölüp, on nechche kishi yarilan'ghanliqi delillen'gen. Emma, da'iriler eyni künlerde uchurni qattiq qamal qilghanliqi üchün weqede ölgen we yarilan'ghan kimliki ashkarilanmighan. Bu weqe eng awwal ijtima'iy taratqularda tarqalghan bolup, weqening

Guma kona bazardiki piyadiler kochisida yüz bergenliki bayan qilin'ghan. Ijtima'iy axbarat wasitiliridiki bu uchurlarning beziliride, weqening bombiliq hujum ikenliki we ölgüchilerning hemmisining saqchi ikenliki tilgha élin'ghan؛ bezi uchurlarda weqening saqchilarning bixeterlik tekshürüsh dawamidiki zorawanliqi sewebidin kélip chiqqanliqi, weqede ölgüchilerning bigunah amma ikenliki ilgiri sürülgen.

Xitay ikki yildin béri sir tutup kéliwatqan guma piyadiler kochisida yüz bergen mezkur qanliq weqe, bu qétim guma choda saqchixanisining bashliqi abduraxman tömürning memliketlik qehriman saqchi bolup mukapatlinishi, radiyomizning qayta diqqitini tartti. Abduraxman tilgha alghan 14-féwral weqesi bilen radiyomiz shu yili 16-féwral küni xewer qilghan piyadiler kochisi weqesining waqit perqi bir kün bolsimu, xitay bilen amérika arisidiki waqit perqi közde tutulsa, ikkisining emeliyette bir weqe ikenliki éhtimalliqi ashkarilanmaqta. Eger ikkisi bir weqe bolghan teqdirde, abduraxman tömürning weqede oynighan roli seweblik memliketlik qehriman bolup bahalinishi weqening ijtima'iy axbaratlarda déyilgendek chongluqi we jiddiylikini isharetlimekte.

Muhajirettiki Uyghur közetküchiler, xitayning Uyghur rayonini dunyagha tinch rayon qilip körsitish we yaki Uyghur rayondiki xitay köchmenlirini ürkütüp qoymasliq üchün, rayonda yüz bériwatqan qanliq weqelerning mutleq köp qismini axbarattin yoshurup kéliwatqanliqini bayan qilishqan.

Toluq bet