Qeshqer Uyghur neshriyatining xadimliridin 30 pirsentining tutqunda ikenliki ashkarilandi

Qeshqer Uyghur neshriyatidin bultur we bu yil ichide tutulghanlar heqqidiki éniqlashlirimiz dawamida, mezkur neshriyatta 49 neper ishchi-xizmetchi barliqi, bulardin 4 nepirining xitay ikenliki, qalghan 45 neper xadimdin 14 nepirining, yeni 30 pirsentining tutqunda ikenliki ashkarilandi.

Qeshqer Uyghur neshriyatidin 14 kishining tutqunda ikenliki heqqide uchur tapshuruwalghandin kéyin, biz bu 14 kishining éniq kimliki heqqide dawamliq halda melumat igiliduq.

Ziyaretlirimiz dawamida téléfonimiz qeshqerning melum bir yézisigha chüshken xizmet guruppisining téléfonigha baghlandi. Nöwette siyasiy terbiye xizmiti bilen shughulliniwatqan, ilghar partiye ezaliridin teshkillen'gen bu guruppa xadimliri qeshqer neshriyatidiki tutqunlarning ehwalidin melumat berdi.

Melum bolushiche, qeshqer Uyghur neshriyatining Uyghur tehrir bölümining mudiri abduraxman abduréhim bultur öktebirde tutqun qilin'ghan. Yene melum bolushiche, qeshqer neshriyatidin aliy muherrir güzelnur qasim bilen anargül hékim eng yéqinda tutqun qilin'ghan. Éniqlashlirimizdin melum bolushiche, ötken yil tutulghanlar arisida korréktor memet sidiq, toxtamliq xadim emirulla enwermu bar iken.

“Mesililik kitablar” ni tekshürüsh nami astida Uyghur neshriyatchiliqigha qarshi qozghalghan bu zerbe dolqunida hetta naborchikliklarmu chette qalmighan. Bu dolqunda “‛mesililik kitab‚ qa qoli tekken herqandaq kishi jawabkarliqqa tartilish” dégen buyruqqa bina'en kitabni yazghan, tehrirligen, testiqlighandin bashqa, uni basqan ishchilarmu zerbe nishani bolghan. Buning netijiside ishchi zeytune obulqasim bilen memet zununmu qamaqqa élin'ghan. Yene melum bolushiche, pénsiyege chiqqan tehrir mahinur hamut chet'el ziyariti seweblik tutup kétilgen.

Bu töwen'ge chüshken kadirlar ichidiki qeshqer neshriyatining ehwalidin yéqindin xewerdar bolghan bir xadim, bu neshriyatta jem'iy 49 neper xadim barliqi, bulardin 4 nepirining xitay ikenliki bularning peqet memuri ishlargha mes'ul ikenlikini bayan qildi. U yene qalghan 45 xadimning Uyghur ikenlikini, ulardin hazirgha qeder 14 xadimning tutqun qilin'ghanliqini we tutqunning téxi toxtimighanliqini, chünki “Mesililik kitablar” üstidiki tekshürüshning téxi dawam qiliwatqanliqini ashkarilidi.

Ilgiriki programmilirimizda, qeshqer neshriyatining 3 ewlad bashliqliridin abliz ömer, osman zunun we ablajan séyitlarning, shundaqla balilar edebiyati yazghuchisi memetjan abliz böriyar we péshqedem edib haji mirza kérimining tutulghan we késilgenlikini xewer qilghan iduq. Bularni bügünkiler bilen qatqanda qeshqer Uyghur neshriyatidiki 45 xadimning 14 nepiri yeni 30 pirsentining tutqunda ikenliki aydinglashti.

Radiyomizgha kelgen inkasta, qeshqer Uyghur neshriyatida hazirgha qeder rehberlik wezipisi ötigenlerdin, abley dégen kishiningla aman qalghanliqi, uningmu wapat bolup ketkenliki üchünla tutqundin aman qalghanliqi ilgiri sürgen xizmet guruppisidiki bir xadim, qeshqer neshriyatining eng deslepki rehbirining merhum abley abduzahir dégen kishi ikenlikini tilgha aldi.

Xitayning qeshqer Uyghur neshriyatigha qarita élip barghan bu teqib we zerbe herikiti heqqide amérikidiki doktor qahar baratning qarishiche, xitay bu nöwet özige qarshi yézilghan kitablarghila emes, belki Uyghur neshriyatchiliqining mewjutluqigha qarishi heriket qozghighan.