Хотән шәһәрлик әдлийә идариси хадими: "шәһәр ичидә йиғивелиш лагеридин үчи бар"

Мухбиримиз шөһрәт һошур
2018-05-22
Share
yepiq-terbiyelesh-lagiri-yeqindin-tartilghan-xerite-1.jpg Кишилик һоқуқ вәзийити көзәткүчиси, җаң шавн исимлик алий мәктәп оқуғучиси твитерда хотән ласкуйдики йиғивелиш лагери дәп көрсәткән хәритиси.
Social Media/Shown Zhang

Йеқинда канадалиқ бир алий мәктәп оқуғучиси вә кишилик һоқуқ вәзийити көзәткүчиси, хитай ширкәтлириниң тор бәтлиридин хитайниң уйғур районидики йиғивелиш лагерлири қурулушуни һөддигә бериш еланлирини тепип чиқти вә буниңға асасән бир қисим лагерларниң орни вә көлими һәққидә мәлумат бәрди.

Мухбиримизниң бу йеңидин байқалған лагерларниң әһвали һәққидә райондин әһвал ениқлиши давамида, хотән шәһәр ичиниң өзидила 3 орунда йиғивелиш лагери барлиқи әдлийә идариси хадими тәрипидин дәлилләнди.

Җаң шав исимлик канадлиқ алий мәктәп оқуғучиси дәсләптә қағилиқниң тетир йезисида қурулуши пиланланған йиғивелиш лагериниң һөддигә бериш уқтурушини елан қилған иди. У, униң кәйнидин йеңисарниң қизил йезисида қурулмақчи болған бир лагер һәққидики уқтурушни елан қилди. Уқтурушта селинидиған қурулушниң көлими 300 квадрат метир, әслиһәлири болса синип, ятақ, мунча, һаҗәтхана, мудапиә теми вә сим тосуқ дәп көрситилгән; қурулушқа җәмий бир милйон 100 йүән мәбләғ айрилғанлиқи билдүрүлгән. Уқтурушта, қурулушниң нами "қизил қанун түзүм тәрбийәләш мәктипи", орни болса "қизил йезилиқ һөкүмәтниң йени" дәп көрситилгән. Уқтурушта дейилишичә, бу қурулуш пилани йеңисар наһийәлик һөкүмәтниң 55-номурлуқ һөҗҗити билән тәстиқланған.

Һөҗҗәттә қурулушниң чиқими қизил йезилиқ һөкүмәткә йүкләнгән.

Һөддигәрлик елани бултур 7-айда елан қилинған болуп, лагер қурулушиниң тамамлинип болған яки болмиғанлиқини ениқлаш үчүн йеңисарға телефон қилдуқ. Телефонимиз хадимлар тәрипидин җавабсиз қалдурулди.

Оқуғучи җаң шав йәнә тоқсу наһийәси чиқарған лагер қурулуши еланиниму тепип чиққан. Еланда қурулушниң көлими 12789 квадрат метир, йәр үсти, икки қәвәтлик дәп көрситилгән; қурулушниң нами "болса тоқсу наһийәлик кәспий иқтидар йетилдүрүш мәркизи" дейилгән.

Еланда бу қурулушқа 22 милйон йүән хираҗәт айрилғанлиқи билдүрүлгән. Еланда дейилишичә, бу қурулуш пилани тоқсу наһийәсиниң 2017-йили 49-номурлуқ һөҗҗити билән тәстиқланған.
Һөҗҗәттә қурулушниң наһийәлик әдлийә идариси тәрипидин һөддигә берилидиғанлиқи вә хираҗәтниң наһийә малийәсидин чиқирилидиғанлиқи билдүрүлгән.

Бу қурулуш һәққидики ениқлашлиримизму, телефон йоллириниң қислиқи вә бағланмаслиқи, болупму учур чәклимисиниң қаттиқлиқи сәвәбидин нәтиҗисиз қалди.

Оқуғучи җаң шав тиввитирда елан қиливатқан йиғивелиш лагерлири һәққидики бу учурлирида, хотәндики лаской йиғивелиш лагери һәққидиму мәлумат бәргән. Бәш миңдин артуқ адәм барлиқи мәлум болған бу лагер һәққидә мәлумат елиш үчүн, хотән шәһәрлик әдлийә идарисигә телефон қилдуқ. Әдлийә идариси хадими хотән шәһәр ичидила 3 орунда йиғивелиш лагери барлиқини ашкарилиди.

Мухбир: бу хотәндики қайси идарә?
Хадим: хотән шәһәрлик әдлийә идариси.
Мухбир: һазир шәһәр ичидә тәрбийәләп өзгәртиш мәркизидин қанчиси бар?
Хадим: үч орунда бар.
Мухбир: буларда җәмий қанчилик адәм бар?
Хадим: тохтап туруң, материялға бир қариветәй.

Хадим шәһәр бойичә лагерларниң вә униңда йетиватқанларниң омуми сани һәққидики соалимизға дәсләптә җаваб беришкә мақул кәлгән болсиму, арқидин җаваб бериш нийитидин йенивалди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт