"Yépiq terbiye" bashlan'ghandin buyan qaraqashta ikki kenttin 26 adem lagérda jan üzgen

Muxbirimiz shöhret hoshur
2018-06-14
Élxet
Pikir
Share
Print
Xitay saqchiliri kochida ötüp kétiwatqan puqralarni tosup, soraq qiliwatqan körünüsh. 2017-Yili 3-noyabir, xoten.
Xitay saqchiliri kochida ötüp kétiwatqan puqralarni tosup, soraq qiliwatqan körünüsh. 2017-Yili 3-noyabir, xoten.
AP Photo/Ng Han Guan

Muxbirimizning xoten qaraqashtiki "Yighiwélish lagérliri" heqqide ehwal igileshliri dawamida Uyghur diyarida "Yépiq terbiye" dolquni qozghalghandin buyan qaraqash bazirining chinibagh saqchixanisigha tewe ikki kenttinla 26 kishining lagérda jan üzgenliki ashkarilandi.

Beydu uchur ambirida körsitilishiche, qaraqash nahiyesining omumiy nopusi 530110 iken. Qaraqash bazirining omumiy nopusi bolsa 34446 iken. Qaraqash chinibagh saqchixanisining bir xadimining bayan qilishiche, mezkur saqchixanigha qaraqash baziridiki 24 kenttin 11 kent we ikki ahaliler kométititi qarashliq iken. Buning ichide yéngisheher kentining omumi nopusi 1700 nechche bolup, buning 40 pirsenti nöwette "Yighiwélish lagéri" da iken.

Chinibagh saqchixanisidiki bir xadim bu saqchixanigha tewe yéngisheher kentidinla 13 kishining lagérda ölgenlikini ashkarilidi. Bu saqchixanining konasheher we yéngisheherdin ibaret ikki kentke mes'ul xadimi, lagér qurulghandin buyan, bu ikki kenttin lagérgha élip kétilgenlerdin 26 kishining lagérdin jesiti chiqqanliqini bayan qildi.

Bu ehwalni mezkur ikki kentke mes'ul amanliq mudirimu delillidi. U bu uchurni yéziliq hökümette échilghan bir yighinda anglap qalghanliqini pash qildi. Saqchi xadimliri bu 26 ademning konkrét ölüm sewebidin xewiri yoqluqini bayan qilish bilen birlikte ularning ölümige lagérning omumiy shara'iti seweb bolghanliqini chetke qaqmidi. Aldinqi künidiki programmimizda melumat bergen saqchi xadimi yéngisheher kentidin ölgen abdul'ehed baqqalning lagérdiki qorqunchluq weziyet sewebidin qan bésimi örlep ketkenliki we bu sewebtin jan üzgenlikini melum qilghan idi.

Saqchi xadimlirining bayanliridin melum bolushiche, mezkur ikki kentning omumiy nopusi 3000 bilen 4000 arisida iken. Bu nopusning nöwette 40 pirsenti, yeni 1200 bilen 1600 etrapida kishi qaraqash nahiyesidiki herqaysi "Yighiwélish lagérliri" da solinip yatmaqtiken. Bularning ichide lagérda jan özgen 26 kishidin peqet bir kishining, yeni 3 balining atisi, 37 yashliq abdu'ehed baqqalning kimliki melum boldi.

Toluq bet