Qaramaydiki lagérdin qoyup bérilgen polat ibrahimning 10 kündin kéyin jan üzgenliki ilgiri sürülmekte

Ixtiyariy muxbirimiz arslan
2020-01-20
Élxet
Pikir
Share
Print
Hazir istanbulda yashawatqan munewwer xanim lagérgha solan'ghan a'ile ezaliri we qérindashliri.
Hazir istanbulda yashawatqan munewwer xanim lagérgha solan'ghan a'ile ezaliri we qérindashliri.
RFA/Arslan

Hazir istanbulda yashawatqan munewwer xanim yoldishi polat ibrahimning qaramaydiki lagérdin doxturxanigha élip chiqilip 20 kün dawalitilghanliqi, axirida öyige qoyup bérilip, 10 kündin kéyin tuyuqsiz ölüp ketkenlikini bildürdi.

Munewwer xanim yene a'ilisidin 3 inisi we 2 singlisini öz ichige alghan birmunche tughqanlirining lagérgha qamalghanliqini ashkarilidi.

Esli qaramay shehiridin bolghan munewwer ablimit xanim a'ilisidikilerning hemmisining ishchi-xizmetchi ikenlikini, dadisi ablimit hajim bilen anisi ayimnisa xanimning ilgiri hej perzni ada qilghanliqini, ularning künde besh waq namaz oqughandin bashqa héchqandaq gunahi yoqluqini, biraq xitay da'irilirining ularning a'ilisi "Diniy a'ile" dep anisidin bashqa pütkül a'ile ezalirini tutup ketkenlikini bildürdi.

Munewwer xanimning bir qiz, bir oghul ikki perzenti bolup, u perzentlirini türkiyede oqutush üchün 2015-yili 7-ayning 11-küni istanbulgha kélip orunlashqan iken. Munewwer xanim balilirini istanbulda mektepke orunlashturup qoyup ikki aydin kéyin qaramaygha qaytip ketken. U qaramaygha qaytip barghandin kéyin saqchilar teripidin bir qanche qétim soraqqa tartilghan. Weziyette özgirish bolup, hökümet Uyghurlarning pasportlirini yighiwélishqa bashlighanda munewwer xanim 2016-yili 2-ayning 19-küni türkiyege qayta kéliwalghan.

Munewwer xanim istanbulgha kelgendin kéyin uning yoldishi polat ibrahim qaramayda xitay saqchiliri teripidin tutup kétilgen. Uning yoldishi lagérdiki qiyin-qistaq tüpeyli yürek késili qozghilip, doxturxanigha élip chiqilghan we bir mezgil dawalitilghandin kéyin öyige qoyup bérilgen. Halbuki, öyige qaytip chiqip 10 kün bolghanda, yeni 2017-yili 3-ayning 3-küni tuyuqsiz jan üzgen.

Munewwer xanim yoldishining ölüm xewirini inisining shu küni yollighan awazliq uchurdin xewer tapqanliqini, kéyin istanbulgha kelgen yéqin tonushliridin bu ehwallarni sorap bilgenlikini we miyitini yuyuwatqanda tartilghan resimlerni körgenlikini bayan qildi. Munewwer xanim yene hayat qalghan bashqa uruq-tughqanliridin héchqandaq uchur alalmighanliqidin qattiq endishide ikenlikini bildürdi.

Munewwer xanim singlisi senewer ablimitning qaramay téléwiziye istansisida ishleydighanliqini, biraq hazir yighiwélish lagérigha qamalghanliqini bildürdi. Uningdin bashqa yene inisi enwer ablimitqa 8 yilliq qamaq jazasi bérilip türmige qamalghanliqini, yene bir inisi ablajan ablimitning lagérda ikki puti méyip bolup mangalmas bolup qalghandin kéyin öyige qoyup bérilgenlikini ashkara qildi. U yene bir inisi muxbil ablimit we yoldishi polat ibrahimning achisi reyhan ibrahim qatarliq a'ile jemetining tutulup kétilgenlikini, hazir ularning aqiwitining qandaq bolghanliqini bilmeydighanliqini ilgiri sürdi.

Munewwer ablimit xanim özining ikki balisini türkiyege élip kélip mektepte oqutushtin bashqa héchqandaq gunahi yoqluqini, xitayning siyasitige qarshi héchqandaq bir pa'aliyetke qatnashmighanliqini, shundaq bolsimu pütün a'ilisidin aka-iniliri, acha-singillirining tutup kétilgenlikini, ularning tutulup kétishige özining chet'elge chiqqanliqi seweb boldi dep qaraydighanliqini tekitlidi.

Munewwer ablimit xanim axirida dunya jama'itige xitab qilip, birleshken döletler teshkilati we amérika qatarliq pütkül démokratik döletler hemde xelq'araliq teshkilatlarning Uyghurlargha ige chiqishini telep qilidighanliqini bildürdi.

Toluq bet