Қазақистанда мәктәпни ана тилида пүттүргән уйғур қиз-йигитлири гуваһнамә тапшурувалди

Ихтиярий мухбиримиз ойған
2022.06.21
Share on WhatsApp
Share on WhatsApp
qazaqistan-mektep-tamamlash-1.jpg Алмута вилайити әмгәкчиқазақ наһийәсиниң маливай оттура мәктипидә гуваһнамә тапшуруш тәнтәнисидин көрүнүш. 2022-Йили 17-июн, қазақистан.
RFA/Oyghan

Қазақистанниң аммиви ахбарат васитилири вә иҗтимаий таратқулирида елан қилинған хәвәрлиригә қариғанда, қазақистан җумһурийити маарип министирлиқиниң буйруқиға бинаән 17-18-июн күнлири мәмликәтниң барлиқ оттура мәктәплиридә бу йил мәктәпни тамамлиғучиларға гуваһнамә тапшуруш тәнтәнилири болуп өткән.

Мәлуматлардин игилишимизчә, бу йил омумән қазақистанниң алмута шәһири вә алмута вилайитидә оқутуш уйғур тилида йүргүзүлидиған 62 таза уйғур вә арилаш, йәни оқутуш қазақ, уйғур вә рус тиллирида елип берилидиған мәктәпләрдә билим еливатқан 17 миң оқуғучидин 921 нәпәр бала мәктәпни пүттүргән.

Алмута вилайити әмгәкчиқазақ наһийәсиниң маливай оттура мәктипидә гуваһнамә тапшуруш тәнтәнисидин көрүнүш. 2022-Йили 17-июн, қазақистан.

Биз шу мунасивәт билән бу оқуш йилида яхши көрсәткүчләрни қолға кәлтүрүватқан бирқатар мәктәпләр билән алақиләштуқ һәмдә мәктәп тамамлаватқан уйғур балилириниң кәсип таллиши, алий мәктәпләргә оқушқа кириш, шуниңдәк ана тилида оқутушта пәйда болуватқан бәзи мәсилиләр бойичә мәлуматларни игилидуқ.

Радийомиз зияритини қобул қилған алмута шәһириниң достлуқ мәһәллиси абдулла розибақийеф намидики 153-мәктәп-гимназийәниң мудири шавкәт өмәроф әпәнди мундақ деди: “бүгүнки күндә мәктәплиримизниң тамамлиғучилири өзигә хас, муһим, иш тапалайдиған кәсипләрни таллаватиду. Сәвәби көплигән кәсипләрдә оқуған билән униң иш җәряни мурәккәп, әлвәттә. Һазир балилиримиз көпинчә ахбаратлиқ технологийә бойичә һәм шундақла техникилиқ пәнләр физика, химийә, математика пәнлиригә йеқин кәсипләрни игилимәкчи болуп, алий оқуш орунлирини таллаватиду. Уйғур мәктәплири, қазақ тиллиқ мәктәпләр болсун, математика, физика, тарих пәнлириниң муәллимлиригә моһтаҗ. Шуниң үчүн балилиримиз шу пәнләрни таллап алмақта. Бүгүнки күндә мәктипимизниң барлиқ оқуғучилири арзу-арманлириға йетиш үчүн биртуташ дөләтлик имтиһанларға йил бойи наһайити яхши тәйярлиқ қилди”.

Алмута шәһириниң достлуқ мәһәллиси абдулла розибақийеф намидики 153-мәктәп-гимназийәсидә гуваһнамә тапшуруш тәнтәнисидин көрүнүш. 2022-Йили 17-июн, қазақистан.
Алмута шәһириниң достлуқ мәһәллиси абдулла розибақийеф намидики 153-мәктәп-гимназийәсидә гуваһнамә тапшуруш тәнтәнисидин көрүнүш. 2022-Йили 17-июн, қазақистан.
RFA/Oyghan

Шавкәт өмәроф шундақла өзини ойландуруватқан, тәшвишләндүрүватқан мәсилиләрниңму мәвҗут икәнликини баян қилди. У бу оқуш йили бу мәктәпни 63 бала яхши баһалар билән пүттүрүп, уларниң төт нәпириниң әла баһаларға, шу җүмлидин иккисиниң “алтун бәлгә” дәриҗиси билән тамамлаватқанлиқини, улар арисидин устазлиқ кәспини таллап алғанларниңму бар икәнликини билдүрди.

Шавкәт өмәрофниң ейтишичә, қазақистанда оқутуш уйғур тилида йүргүзүлидиған 62 мәктәп болуп, уларға һөкүмәт тәрәптин йетәрлик дәриҗидә хираҗәт аҗритилмақта вә оқуш қораллири билән тәминләнмәктикән.

Алмута вилайити әмгәкчиқазақ наһийәсиниң маливай оттура мәктипи мудириниң оқуш ишлири бойичә орунбасари арзугүл абдуримова ханим зияритимизни қобул қилип, бу һәқтә өз пикирлирини оттуриға қойди.

Алмута шәһириниң достлуқ мәһәллиси абдулла розибақийеф намидики 153-мәктәп-гимназийәсидә гуваһнамә тапшуруш тәнтәнисидин көрүнүш. 2022-Йили 17-июн, қазақистан.

Униң ейтишичә, бу оқуш йили бу мәктәпни 39 уйғур қиз-йигити, шу җүмлидин төт бала әла тамамлап, “алтун бәлгә” саһиби аталған. Шуниңдәк мәктәп пүттүргән балиларниң барлиқи бир туташ имтиһанға тәйярлиқ ишлирини актип йүргүзмәктә.

У мундақ деди: “мәктәпни тамамлиған оқуғучилиримизниң көпчилики йеза игилики, педагогикилиқ, техникилиқ мутәхәссисликләрни таллап, һөкүмәт һесабиға оқушқа чүшти. Бу оқуш йили кимләрниң қайси оқушқа чүшкәнлики техи намәлум. Чүнки бу йил һөкүмәт тәрәптин икки мумкинчилик берилди. Бу йил пүттүрүватқан оқуғучилиримиз асасән педагогикилиқ, икки оқуғучимиз техникилиқ, икки оқуғучимиз йеза игилики мутәхәссисликини таллаватиду. Маливай оттура мәктипидә асасән математика мени муәллимлири йетишмәйду, шуңлашқа наһийәлик билим бөлүмигә өтүнүш йезип қойған”.

Арзугүл абдуримова йәнә миллий маариптики асасий тәшвишләндүридиған мәсилиләрниң бири бу уйғур тилидики синипларниң йепилип кетиш хәвпи болуп, көп йиллардин буян бу мәсилигә алаһидә көңүл бөлүнүп келиватқанлиқини билдүрди.

Игилинишичә, қазақистан уйғурлири узун йиллардин буян өзлириниң ана тилидики мәктәп вә синиплирини сақлап қелиш үчүн һәртәрәплимә һәрикәтләрни йүргүзүп келиватмақта. Җәмийәтлик бирләшмиләр, зиялийлар, миллий маарип җанкөйәрлири бу йөнилиштә җиддий тиришиватқан болсиму, йәнила ана тилида оқуватқан балилар саниниң қисқирип кетиш хәвпи мәвҗут болмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.