Qazaqistanda mektepni ana tilida püttürgen Uyghur qiz-yigitliri guwahname tapshuruwaldi

Ixtiyariy muxbirimiz oyghan
2022.06.21
Share on WhatsApp
Share on WhatsApp
qazaqistan-mektep-tamamlash-1.jpg Almuta wilayiti emgekchiqazaq nahiyesining maliway ottura mektipide guwahname tapshurush tentenisidin körünüsh. 2022-Yili 17-iyun, qazaqistan.
RFA/Oyghan

Qazaqistanning ammiwi axbarat wasitiliri we ijtima'iy taratqulirida élan qilin'ghan xewerlirige qarighanda, qazaqistan jumhuriyiti ma'arip ministirliqining buyruqigha bina'en 17-18-iyun künliri memliketning barliq ottura mektepliride bu yil mektepni tamamlighuchilargha guwahname tapshurush tenteniliri bolup ötken.

Melumatlardin igilishimizche, bu yil omumen qazaqistanning almuta shehiri we almuta wilayitide oqutush Uyghur tilida yürgüzülidighan 62 taza Uyghur we arilash, yeni oqutush qazaq, Uyghur we rus tillirida élip bérilidighan mekteplerde bilim éliwatqan 17 ming oqughuchidin 921 neper bala mektepni püttürgen.

Almuta wilayiti emgekchiqazaq nahiyesining maliway ottura mektipide guwahname tapshurush tentenisidin körünüsh. 2022-Yili 17-iyun, qazaqistan.

Biz shu munasiwet bilen bu oqush yilida yaxshi körsetküchlerni qolgha keltürüwatqan birqatar mektepler bilen alaqileshtuq hemde mektep tamamlawatqan Uyghur balilirining kesip tallishi, aliy mekteplerge oqushqa kirish, shuningdek ana tilida oqutushta peyda boluwatqan bezi mesililer boyiche melumatlarni igiliduq.

Radiyomiz ziyaritini qobul qilghan almuta shehirining dostluq mehellisi abdulla rozibaqiyéf namidiki 153-mektep-gimnaziyening mudiri shawket ömerof ependi mundaq dédi: “Bügünki künde mekteplirimizning tamamlighuchiliri özige xas, muhim, ish tapalaydighan kesiplerni tallawatidu. Sewebi köpligen kesiplerde oqughan bilen uning ish jeryani murekkep, elwette. Hazir balilirimiz köpinche axbaratliq téxnologiye boyiche hem shundaqla téxnikiliq penler fizika, ximiye, matématika penlirige yéqin kesiplerni igilimekchi bolup, aliy oqush orunlirini tallawatidu. Uyghur mektepliri, qazaq tilliq mektepler bolsun, matématika, fizika, tarix penlirining mu'ellimlirige mohtaj. Shuning üchün balilirimiz shu penlerni tallap almaqta. Bügünki künde mektipimizning barliq oqughuchiliri arzu-armanlirigha yétish üchün birtutash döletlik imtihanlargha yil boyi nahayiti yaxshi teyyarliq qildi”.

Almuta shehirining dostluq mehellisi abdulla rozibaqiyéf namidiki 153-mektep-gimnaziyeside guwahname tapshurush tentenisidin körünüsh. 2022-Yili 17-iyun, qazaqistan.
Almuta shehirining dostluq mehellisi abdulla rozibaqiyéf namidiki 153-mektep-gimnaziyeside guwahname tapshurush tentenisidin körünüsh. 2022-Yili 17-iyun, qazaqistan.
RFA/Oyghan

Shawket ömerof shundaqla özini oylanduruwatqan, teshwishlendürüwatqan mesililerningmu mewjut ikenlikini bayan qildi. U bu oqush yili bu mektepni 63 bala yaxshi bahalar bilen püttürüp, ularning töt nepirining ela bahalargha, shu jümlidin ikkisining “Altun belge” derijisi bilen tamamlawatqanliqini, ular arisidin ustazliq kespini tallap alghanlarningmu bar ikenlikini bildürdi.

Shawket ömerofning éytishiche, qazaqistanda oqutush Uyghur tilida yürgüzülidighan 62 mektep bolup, ulargha hökümet tereptin yéterlik derijide xirajet ajritilmaqta we oqush qoralliri bilen teminlenmektiken.

Almuta wilayiti emgekchiqazaq nahiyesining maliway ottura mektipi mudirining oqush ishliri boyiche orunbasari arzugül abdurimowa xanim ziyaritimizni qobul qilip, bu heqte öz pikirlirini otturigha qoydi.

Almuta shehirining dostluq mehellisi abdulla rozibaqiyéf namidiki 153-mektep-gimnaziyeside guwahname tapshurush tentenisidin körünüsh. 2022-Yili 17-iyun, qazaqistan.

Uning éytishiche, bu oqush yili bu mektepni 39 Uyghur qiz-yigiti, shu jümlidin töt bala ela tamamlap, “Altun belge” sahibi atalghan. Shuningdek mektep püttürgen balilarning barliqi bir tutash imtihan'gha teyyarliq ishlirini aktip yürgüzmekte.

U mundaq dédi: “Mektepni tamamlighan oqughuchilirimizning köpchiliki yéza igiliki, pédagogikiliq, téxnikiliq mutexessisliklerni tallap, hökümet hésabigha oqushqa chüshti. Bu oqush yili kimlerning qaysi oqushqa chüshkenliki téxi namelum. Chünki bu yil hökümet tereptin ikki mumkinchilik bérildi. Bu yil püttürüwatqan oqughuchilirimiz asasen pédagogikiliq, ikki oqughuchimiz téxnikiliq, ikki oqughuchimiz yéza igiliki mutexessislikini tallawatidu. Maliway ottura mektipide asasen matématika méni mu'ellimliri yétishmeydu, shunglashqa nahiyelik bilim bölümige ötünüsh yézip qoyghan”.

Arzugül abdurimowa yene milliy ma'ariptiki asasiy teshwishlendüridighan mesililerning biri bu Uyghur tilidiki siniplarning yépilip kétish xewpi bolup, köp yillardin buyan bu mesilige alahide köngül bölünüp kéliwatqanliqini bildürdi.

Igilinishiche, qazaqistan Uyghurliri uzun yillardin buyan özlirining ana tilidiki mektep we siniplirini saqlap qélish üchün hertereplime heriketlerni yürgüzüp kéliwatmaqta. Jem'iyetlik birleshmiler, ziyaliylar, milliy ma'arip janköyerliri bu yönilishte jiddiy tirishiwatqan bolsimu, yenila ana tilida oquwatqan balilar sanining qisqirip kétish xewpi mewjut bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.