Қазақистандики уйғур яш тәнһәрикәт маһирлири тушмутуштин алтун медалға еришти

Алтун медалға еришкән әләнур турғанова(иккинчи қатар солдин иккинчи). 2023-Йили сентәбир, қазақистан.

Қазақистандики уйғур өсмүрлири асия вә дуня мусабиқилиридә тәнһәрикәтниң һәр хил түрлиридә чоң нәтиҗиләргә еришип кәлмәктә. Уларниң қолға кәлтүргән утуқлири қазақистанниң аммиви ахбарат васитилиридиму йоритилип, уйғур җамаитини хушал қилмақта. Өз нөвитидә уйғурларму уларни дағдуғилиқ қарши елип, риғбәтләндүрүшни әнәнигә айландурди.

Биз бу һәқтә қазақистандики уйғур тәнһәрикәтчилириниң утуқлири һәққидә қазақистан уйғур яшлири бирликиниң әзаси қолдаш шәмшидиноф әпәндидин мәлумат игилидуқ. У мундақ деди: “қазақистандики уйғурларниң елимизниң һәр саһәлиридә, мәйли мәдәнийәт, сәнәт, илим-пән, әдәбият, ишләпчиқириш, санаәт, йеза игилики вә башқилар болсун, чоң утуқларға йетиватқанлиқи мәлум. Шәхсән маңа охшаш уйғурларни кейинки вақитларда хушал қиливатқан нәрсә шуки, бизниң яшлиримиз тәнһәрикәтниң һәр хил түрлиридә чоң нәтиҗиләргә еришип, пәқәт уйғурларнила әмәс, бәлки пүткүл қазақистан хәлқини хушал қиливатқанлиқи һәм қазақистан туғини дуняға тонутуватқанлиқидур. Қазақистан тәнһәрикитини дуняға тонутқан абдурешит абдурахманоф, туйғун насироф, һемит тохтахунофқа охшаш даңлиқ тәнһәрикәтчилиримизниң изини бесип келиватқан яшлиримизму һазир аз әмәс. Мана түнүгүнла даңлиқ гимнастикичи нариман қурбаноф һәққидә яхши хәвәр алдуқ. У хитайниң хаңҗо шәһиридә болуп өткән асия мусабиқилиридә үчинчи орунни игиләп, мис медали билән тәқдирләнди. Бу, қазақистан мәмликити үчүнму чоң утуқ. Нариман илгириму хәлқара вә дуня мусабиқилиригә қатнишип, алдинқи орунларни игиләп кәлгән иди. Биз мушу йеқинда бокс вә ушу-санда(чамбашчилиқ) дин алтун медалға еришкән әләнур турғанова, әлиҗан абләһәтов вә сухраб адилоф қатарлиқ көплигән қериндашлиримизниң утуқлиридин мәғрурлинимиз”.

RFA/Oyghan

Игилишимизчә, 25 яшлиқ нариман қурбаноф гимнастикиниң яғач атта оюн көрситиш түри бойичә бир нәччә қетим дуня чемпийони атиқиға муйәссәр болған уйғур йигити. У, 2018-йили канадада өткән дуня гимнастика мусабиқисидә “яғач атта моллақ етиш” һәрикитини әң юқири дәриҗә көрситип, хәлқара гимнастика федератсийәси униң бу һәрикәт шәклигә “қурбанофчә һәрикәт” дәп нам бәргәниди.

Биз шуниңдәк қазақистанниң түркистан вилайитигә қарашлиқ шардара шәһиридә болуп өткән бокс бойичә хәлқара мусабиқигә қатнишип, алтун медалға еришкән уйғур қизи әләнур турғанованиң тренери, рефери, бокс маһири закир абдуқадироф әпәнди билән алақиләштуқ.

RFA/Oyghan

У мундақ деди: “11-сентәбирдин 17-сентәбиргичә шардара шәһиридә бокс бойичә чоң мусабиқә болуп өтти. Бу чоң хәлқара мусабиқә дәп һесаблиниду. Буниңға 250 боксчи кәлди. яшларниң, қизларниң мусабиқиси болди. Униңға өзбекистан, қирғизистан, таҗикистан вә пүткүл қазақистанниң боксчилири қатнашти. Шу мусабиқидә қизимиз әләнур турғанова үч қетим йәкму-йәк елишип үчилисидә йеңип, чемпийон болди. Әмди биз 21-өктәбирдә астана шәһиридә өтидиған асия мусабиқисигә тәйярлинип, чоң пиланларни түзүватимиз”.

Әләнур турғанова 2006-йили алмута вилайитиниң әмгәкчиқазақ наһийәсигә қарашлиқ қорам йезисида туғулған. У даңлиқ тәнһәрикәтчи һемит тохтахунофниң шагиртлириниң биридур. Әләнур өсмүрләр арисидики бокс бойичә бир қанчилиған хәлқара вә дуня мусабиқилириниң ғалиби.

Биз йәнә макав шәһиридә ушу-санда, йәни чамбашчилиқ бойичә мусабиқигә қатнашқан алмута вилайитиниң талғир наһийәсигә қарашлиқ қизилтуғ йезисидики тәнһәрикәт кулубиниң әзаси әлиҗан абләһәтоф вә “нийәт” кулубиниң әзаси сухраб адилофларниң асия чемпийонлири аталғанлиқидин хәвәр таптуқ.

RFA/Oyghan

Биз чамбашчилиқ бойичә асия чемпийони, 2007-йили туғулған әлиҗан әбләһәтоф билән алақиләшқинимизда у өзиниң тренер вә дадиси әркин шайефниң буниңға көп күч чиқарғанлиқини алаһидә тәкитләп, мундақ деди: “мени мушу тәнһәрикәткә йетәклигән мениң тренерим вә дадам. Мениң чоң мусабиқәм 2019-йили 11йешимда тайландниң баңкок шәһиридики дуня мусабиқисидә болди. У йәрдә мән биринчи орунни елип, көк байриқимизни көтүрдүм. Иккинчи чоң мусабиқә 2022-йили өзбекистанниң ташкәнт шәһиридә өткән арилаш йәкму-йәк мусабиқиси болди. У йәрдиму биринчи орунни алдим. Хитайда өткән ушу-санда бойичә мусабиқидә иранлиқни 2:0, хитайни 2:0, корейәликни 2:0 һесаби билән йеңивалдим. Бу ғәлибәм ушу-санда бойичә яшлар арисида қазақистан тарихиға биринчи қетим алтун медал елиш болуп һесабланди”.

Мәлуматларға қариғанда, қазақистандики уйғур яшлиридин қиличваз руслан қурбаноф, чамбашчилиқ бойичә алияр қәмирдиноф, җю-җитсу, йәни әркин челишиш вә муштлишиш бойичә чемпийон нузугум исламова вә башқилар асия, хәлқара вә дуня дәриҗисидики мусабиқиләрдә юқири нәтиҗиләргә еришип, пүткүл уйғурларни хуш қилмақта.