Қирғизистан уйғурлири барин инқилабий вә шәрқий түркистан миллий армийәси күнини хатирилиди

Ихтиярий мухбиримиз ферузә
2021-04-09
Share
barin-inqilabi-tutulghan-uyghur.jpg Барин инқилабида йиғивелинған уйғурлар.
RFA/Qutluq

20-Әсир, уйғур хәлқиниң тарихида муһим вәқәләр дәври болди. Бу йүз йил давамида охшашла уйғур дияри азаб-оқубәткә дучар болди. Уйғур дияри тарихидики апрел ейида йүз бәргән муһим вәқәләр қирғизистан уйғурлири тәрипидин бишкек вә җалал-абад шәһәрлиридә хатириләнди. Бу шәһәрләрдә 1945-йили 8-апрел куни қурулған сабиқ миллий армийә күнини вә 1990-йили 5-апрел йүз бәргән барин вәқәсини хатириләш паалийити уюштурулди. 8-Апрел куни паалийәт қирғизистан уйғурлири "иттипақ" җәмийитиниң уюштуруши билән бишкәк шәһириниң аламедин-1 мәһәллисидики мәдәнийәт өйидә өткүзүлди.

Мурасимға чуй вилайитидики уйғур җамаәтчилики қатнашти. Бу йиғинға қирғизистан уйғурлири "иттипақ" җәмийитиниң рәиси әсқәр қасимоф риясәтчилик қилди. Алди билән қәһриманларға атап хәтмә-қуран қилинди, андин пәлсәпә пәнлириниң кандидат доктори әкбәрҗан бавудуноф барин вәқәси тоғрисида тәпсилий доклат оқуди. Өз доклатида әкбәрҗан әпәнди 1990-йили 5-апрел күни үз бәргән барин вәқәсини барин инқилаби дәп атиди.

Радио зияритимизни қобул қилған гүлбаһар әлийева уйғур тарихида йүз бегән вәқәләрни келәчәк әвладларға йәткүзүп бериши лазимлиқини тәкитлиди

Сиясий пәнләрниң магистири абдурәһим һапизи миллий армийә җәңчилириниң җасарити, низам вә мукапатлири һәққидә тарихий доклат оқуп, миллий армийә күниниң уйғур хәлқи үчүн чоң бир байрам болғанлиқини билдүрди.

Мурасим давамида ихтиярий сөзгә чиққан новопокровка йезисиниң йигит беши ғәйрәт җаһаноф уйғур хәлқиниң оғул-қизлири вәтән азадлиқи йолида тохтимай һәрикәт елип баридиғанлиқини тәкитлиди.

Мәзкур паалийәткә миллий инқилабқа қатнашқан, шәрқий түркистан армийәсиниң җәңчиси, ғазилардин пәқәт аблимит бәкри әпәндила қатнишип көзлири нәмләнгән һалда өз әслимилирини баян қилди.

Аблимит бәкри әпәнди 1946-йили шәрқий түркистан миллий армийәси сепидә манас дәрясида бойида мудапиәдә турушқа қатнашқаниди. Нөвәттә миллий армийә җәңчи-офитсерлириниң һаят яшаватқанлири санақлиқла қалғаниди. 1955-1962-Йиллири совет иттипақиға көчүп чиққанлар арисида көп санда миллий армийә офитсер вә җәңчилири бар болуп, уларниң хели көп қисми өзбекистан, қирғизистан вә қазақистанға маканлашқаниди. Қирғизистанға йәрләшкәнләрниң саниму көп болуп, уларниң мутләқ зор қисми вапат болғаниди.

Йеқинқи йиллардин буян техиму көп яшлар тарихий вәтинидә йүз бәргән вәқәләргә көңүл бөлмәктә. Селиштурғинимизда үч йил илгири бу хил паалийәтләргә яшлар қатнашмиғаниди. Әмма һазир яшлар қатнишип, паалийәтни уюштурушларда хизмәт көрсәтмәктә. Зияритимизни қобул қилған иззәт газийеф өзиниң һес-туйғулирини баянқилди.

8-Апрел шәрқий түркистан миллий армийәси күни вә барин инқилабини хатириләш паалийити йәнә җалал-абад шәһиридә паалийәтчи әлишир насирахунофниң тәшәббусида уюштурулди. Бүгүнки күнләрдә дуняға тариған корона вируси вабасиниң қирғизистанда йеңидин күчийип кетиши мунасивити билән көрүлүватқан қаттиқ чариләр сәвәбидин қирғизистанниң җәнубидики уйғурлар мәзкур хатириләш паалийәтлирини тар даиридә өткүзүшкә мәҗбур болди.

Қирғизистан уйғурлири "иттипақ" җәмийити уйғур тарихидики муһим вәқәләрни хатириләшни вә аммиви паалийәтләрни һәр йили өткүзүшкә тиришмақта. Мәзкур паалийәтләр қирғизистан уйғурлириниң миллий роһини көтүрүшидә муһим рол ойнайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт