Қирғизистан вә русийә уйғурлири қурбан һейтта сахавәтлик ишларни қилди

Ихтиярий мухбиримиз ферузә
2022.07.11
Share on WhatsApp
Share on WhatsApp
qirghizistan-qurbanliq-qurban-heyt-3.jpg Қурбан һейтта моһтаҗларға тарқалған қурбанлиқ. 2019-Йили 11-авғуст, қирғизистан.
RFA/Féruze

9-Июл күни пүтүн дуня мусулманлири қурбан һейти өткүзди. Уйғур хәлқиму өзлириниң диндашлири билән биргә муқәддәс пәрзлирини ада қилип қурбан һейтта сахавәтлик ишларни қилишти.

Қирғизистан, қазақистандин қалса оттура асиядики уйғурлар бирқәдәр көп вә зич олтурушқан бир мәмликәт, муһаҗирәттики уйғурлар йәнә русийәниң шәһәрлиригә көп санда олтурақлашқан. Шу мәмликәтләрдә яшаватқан уйғурлар өзлириниң миллий кимликини, өрп-адәтлирини вә диний қаидә-йосунлирини сақлап қелишиға тиришмақта. Әнә шуларниң бири қурбан һейти вә роза һейти қатарлиқ диний вә миллий байрамларни өткүзүштур.

Русийәдики уйғур җамаәтчилики қурбан һейт намизини җамаәт билән оқуп, сахавәтлик ишларни елип барди. Радийомиз зияритини қобул қилған русийә пайтәхти москва вә санктпетербург шәһәрлиридики уйғур җамаитиниң рәһбәрлиридин рәпқәт садиқоф җамаәт әрбаби әлишир нәбиҗанниң башлиқида моһтаҗ аилиләргә қурбанлиқ тарқатқанлиқини билдүрди.

Қирғизистанниң җәнубидики җалал-абад шәһиридә қурбан һейти нағра челинип тәнтәнилик өткүзүлди. Бу шәһәрдиму мәлум сандики уйғурлар өзбек, қирғиз қатарлиқ қериндашлири билән биргә яшаватқан болуп, уйғур җамаәт актиплири мәһәллиләрдики балиларға түрлүк оюнларни уюштуруп уларға совғатлар тапшурушти. Қурбан һейтиниң кейинки күнлиридә, җалал-абад уйғурлири башқа мусулман қериндашлириға охшаш, моһтаҗ аилиләргә қурбанлиқ тарқитишти. Радийомиз зияритимизни қобул қилған җалал-абад областиниң ақ-сақаллар кеңишиниң әзаси әлишир насирахуноф җалал-абад шәһиридики бирқисим чоңлар вә сәбийләрни меһман қилип уларға совғатларни тапшурғанлирини билдүрди.

Әлишир әпәнди йәнә җалал-абад шәһири турғунлириға түркийәдики қериндашлири әвәтип бәргән қурбанлиқлирини тарқитип бәргәнликини тәкитлиди.

Қирғизистанға йәнә германийә шәрқий түркистан учур мәркизидин абдуҗелил қарақаш әпәнди арқилиқ қурбанлиқ әвәтилди. Қирғизистан уйғурлири “иттипақ” җәмийити көп йиллардин буян германийә шәрқий түркистан учур мәркизи билән һәмкарлиқта йүзлигән моһтаҗ аилиләргә қурбанлиқ гөш тарқитип кәлмәктә. Бу йили қирғизистан уйғурлири “иттипақ” җәмийитиниң рәиси әсқәр қасимоф вә уйғурлар зич олтурақлашқан мәһәллиләрниң йигит башлири билән қурбанлиқларни тарқитишқа мәсул болушти.

Қирғизистан уйғур җамаитигә йәнә дуня уйғур қурултийидин қурбанлиқ әвәтилди. Д у қ ниң қурбанлиқлириға қирғизистан уйғурлири “иттипақ” җәмийитиниң сабиқ рәиси дилмурат әкбәроф мәсул болди. Радийомиз зияритини қобул қилған дилмурат әпәнди дуня уйғур қурултийи вә түрк қериндашлириға рәһмитини билдүрүп, қурбанлиқларни аяллар комитети билән һәмкарлиқта тарқитиватқанлиқини тәкитлиди.

Адәттә әвәтилгән қурбанлиқлар милләт айримастин моһтаҗ болған һәммә аилиләргә тарқитилмақта. Бу йилму охшаш тарқитиливатиду, лекин дуня уйғур қурултийи әвәткән қурбанлиқлар аяллар кеңиши арқилиқ уйғур аилиләргә тарқитилған. Радийомиз зияритимизни қобул қилған новопокровка йезисиниң аяллар кеңишиниң рәиси асийәм моллабақийева аяллар кеңишиниң моһтаҗ аилиләрни өз назаритидә тутуп уларға һәр һәр хил байрамларда һәддийәләрни тапшуруп көңүл бөлүп турғанлиқини тәкитлиди.

Қирғизистан уйғурлири “иттипақ” җәмийитиниң муһим чарилиридин бири-қирғизистан вә дуня бойичә уйғурларни тонуштуруш: уйғур хәлқиниң мәдәнийәт байлиқлири, өрп-адәтлириниң қиммитини көрситиштур.

Һазир қирғизистанда һөкүмәт санлиқ мәлумати бойичә 60 миң әтрапида уйғур яшайду. Уйғурлар өзлири әмәлийәттә уйғурларниң униңдин көп икәнликини ейтишмақта. Уйғурлар қирғизистан җумһурийитиниң пуқралири болуш сүпити билән бу дөләтниң түрлүк хизмәтлиригә өз һәссисини қошуп кәлмәктә шуниңдәк өзлириниң тили, мәдәнийити вә өрп-адәтлириниму сақлимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.