“Ittipaq” jem'iyiti Uyghur tenheriketchilerge minnetdarliqini bildürdi

Bishkektin ixtiyariy muxbirimiz féruze teyyarlidi
2023.07.07
qirghizistan-tenheriketchiler-ve-ustatliri-ittipaq-jemiyitining-reisi-bilen Tenheriketchiler we ustazliri ittipaq jem'iyitining re'isi bilen chüshken süret, 2023-yili 6-iyul, qirghizistan
RFA/Feruze

6-Iyul küni qirghizistan Uyghurliri “Ittipaq” jem'iyiti xelq'araliq tenheriket musabiqiliride öz maharetlirini körsitip ghelibe qilghan qirghizistanliq Uyghur tenheriketchilerge minnetdarliqini bildürüsh murasimi uyushturup, ulargha sowghat we pexriy guwahnamilerni tapshurdi.

Mezkur murasim “Ittipaq” jem'iyitining idariside jem'iyet re'isi tursuntay selimofning riyasetchilikide élip bérildi. Bu pa'aliyetke “Ittipaq” jem'iyitining merkiziy kéngesh ezaliri, dunya Uyghur qurultiyining qirghizistandiki wekilliri, “Ittipaq” gézitining muherrirliri we bir top jama'et wekilliri qatnashti.

Melum bolushiche qirghizistandiki Uyghurlarning sani köp emes we bu jumhuriyettiki azsanliq millet bolsimu, emma ular arisidin yétiship chiqqan xéli dangliq tenheriketchiler az emes. Ularning beziliri pütün jumhuriyet, ottura asiyagha, hetta sowét dewride pütün sowét ittipaqigha tonulghanidi. Mesilen, dangliq putbolchi, sowét ittipaqining tenheriket mahiri namigha sazawer bolghan yüsüp musayéfning nami 1960-70-yillarda pütün sowét ittipaqi putbol mestaniliri arisida meshhur idi.

Uningdin bashqa yene sowét ittipaqining tenheriket mahiri, qirghizistan dölet olimpik judo, yeni yaponche chélishish komandisining aliy meshqawuli sawur emetof, dölet olimpik chélishish komandisining aliy meshqawuli perhat hoshurof, qirghizistan tenheriket mahiri, yashlar chélishish komandisining tirénéri shöhret hoshurof qatarliqlar oxshashla köpligen rayon xaraktérlik we dunya musabiqilirining chémpiyonliri bolup shöhret qazan'ghanlar idi.

Mezkur murasim dawamida qirghizistan Uyghurliri “Ittipaq” jem'iyitining re'isi tursuntay selimof nutuq sözlep, mezkur tenheriketchilerni tebriklep, ularning Uyghur xelqini öz maharetliri bilen tonutqanliqi üchün ulargha minnetdarliqini bildürdi.

Xelq'ara derijidiki tenheriket mahiri muhemmed abdulla'éw pexriy guwahname tapshuruwaldi, 2023-yili 6-iyul, qirghizistan
Xelq'ara derijidiki tenheriket mahiri muhemmed abdulla'éw pexriy guwahname tapshuruwaldi, 2023-yili 6-iyul, qirghizistan

Radiyo ziyaritimizni qobul qilghan “Ittipaq” jem'iyitining teptish hey'itining ezasi abduméjit turdiyéf özining qirghizistandiki Uyghur tirénér we tenheriketchiliri bilen pexirlinidighanliqini bildürdi.

Mezkur pa'aliyet dawamida dölet olimpik chélishish komandisining aliy meshqawuli perhat hoshurof qatnashquchilar namidin “Ittipaq” jem'iyitige teshekkür bildürüp mundaq dédi.

 “Eger tenheriketchiler bir musabiqige qatnashsa, hökümetning, tenheriket fédératsiyesining diqqiti we qollishi ularni bek rohlanduridu, lékin öz millitimizning bizge köngül bérip bizge teqdirnamilerni bérishi biz üchün bu intayin qimmetlik. Re'isimiz dégendek eng muhim bolghini sowghat emes, belki köngül. Mana bizning ikki tenheriketchimiz awghust éyida xelq'araliq musabiqige teyyarliniwatidu, bügünki pa'aliyet ularni téximu ilhamlandurdi” .

Mushu yilning iyun éyida qirghizistanliq üch Uyghur tenheriketchisi asiya chélishish musabiqiside altun we mis médallargha érishken. 17 Yashliq yash-ösmürler guruppisida seyid shemshiddinof we mirseyid yünüsoflar altun médalgha érishti. 23 Yashliqlar guruppisida muhemmed abdullayéf mis médalgha érishti. Ötken 2022-yili, nyu-york shehiride ötken xelq'araliq chélishish musabiqiside muhemmed abdullayéf birinchilikke érishken, shundaqla u asiya we dunya musabiqiliride altun, kümüsh we mis médallar bilen mukapatlan'ghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.