4 ‏- Iyun oqughuchilar herikitining 20 yilliqini xatirilesh aq tashliq kitabi élan qilindi

27 - April küni, 1989 - yilidiki 4 - iyon tyen'enmén oqughuchilar herikiti qatnashquchiliri nyuyorkta axbarat élan qilish yighini uyushturghan bolup, yighinda ular 4 - iyun oqughuchilar herikitining 20 yilliqini xatirilesh munasiwiti bilen aq tashliq kitap élan qilghan.
Muxbirimiz gülchéhre
2009-04-28
Share

Nyuyorktiki mezkur axbarat élan qilish yighinigha, eyni dewirdiki oqughuchilar herikiti bashlamchiliridin wang den riyasetchilik qilghan bolup, u 4 - iyon oqughuchilar herikitide öltürülgenlerning hemmisini heqiqiy qehrimanlar dep atash kérek dégen.

Wang den öz nutqida yene " bizning 1989 ‏- yilidiki bu herikitimiz pütün dunyagha xitay xelqining ghururini namayen qildi. 20 Yillardin buyan xitay iqtisadiy tereqqiyat arqiliq ötkür ijtima'iy mesililerni yépishqa urunup, xelqning exlaqi süpitini omumyüzlük töwenleshtürdi" dep körsetken.

Yighinda oqughuchilar herikiti wekili wang jünyaw 27 ‏- aprélni xitaydiki démokratiye bayrimi qilip békitish layihisini tonushturghan. U bu heqte chüshendürüsh bérip 1989 - yili 27 - april künide, béyjingdiki qeyser uniwérsitét oqughuchilirining, xu yawbanggha teziye bildürüsh yighilishini bara ‏- bara parixor emeldarlargha naraziliq bildürüsh, xitayda siyasiy islahat élip bérishni telep qilish herikitige kötürüp, wetenperwerlik xelq herikitining birinchi meydanini hazirlighanliqini shundaqla buning xitay xelq jumhuriyiti qurulghandin buyanqi, siyasiy tarixida tunji qétimliq keng kölemlik démokratik halda élip bérilghan namayish herikiti ikenlikini sherhiligen. Shundaqla halbuki xitay kommunist diktatorlirining xelqning siyasiy arzusini tinch yol bilen ipade qilghan bu herikitinimu qanliq yosunda basturghanliqini qattiq pash qilghan.

Mezkur axbarat élan qilish yighinigha yene, béyjing bahari zhurnilining dangliq muherriri obzorchi xu pingmu qatnashqan bolup, u yighinda 4 - iyon künide aq kiyim kiyip, bu démokratik heriketni hemde herikette xitayning ziyankeshlikige uchrighuchilarni xatirilesh layihisini otturigha qoyghan.

1989 - Yilidiki 4 - iyon tyen'enmén oqughuchilar herikitini, xitay da'iriliri herbiy halet élan qilip, nechche on ming kishilik herbiy qoshuni, tankiliri arqiliq qanliq basturghan bolup, bir qanche yüzligen uniwérsitét oqughuchiliri weqede qan tökken idi.
 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet