Xitay da'irilirining 5 - iyul kéchiche qoralliq ténjitish élip barghanliqi ashkarilanmaqta

En'giliye "yekshenbe waqit géziti" ning bu heqte ürümchide tekshürüsh élip bérip bergen melumatqa qarighanda, Uyghur we xitay guwahchilar at beyge meydanida tang atqiche oq étilghanliqini bildürüshken.

Shawket isimlik bir Uyghur, 5 - iyul kéchide anglighanliri heqqide toxtilip: "men étildaq bilen pilimotning awazini perqlendüreleymen. Oq awazini kéchiche anglidim. Emma qérindashlirimizdin qanchisining öltürülgenliki we qanchisining tutup kétilgenlikini bilmeymiz" dégen.

Bir xitay ayal, özining basturush jeryanida körgenlirini sözlep bergen we: " ular pütün rayonning tokini késiwetkendin kéyin, bérip ulargha tégish qildi. Oq kéchiche étildi," dégen. U yene, tok késiwétilgen bolghachqa jiq körelmigenlikini qoshumche qilghan.

Muxbir yene, ürümchide 5 - iyul öltürülgenlerning mexpiy halda qumluqqa kömüwétilgenliki heqqide söz ‏ - chöchek barliqini, lékin héchkimning buni éniq bilmeydighanliqini yazghan.

5 - Iyul ürümchi namayishini bésiqturush jeryanida, xitay da'iriliri 12 ademning étip öltürülgenlikini étirap qilghan bolsimu, 5 - iyul kéchide tokni késiwetkenlikini hemde kéchiche oq chiqarghanliqini ret qilip kéliwatqan idi.