Aba rayonida xitay qisimliri bilen tibet rahibliri otturisida yüz bergen toqunushta ikki rahib öltürüldi

Xitay da'iriliri tibet rayonlirining biri bolghan emma hazir sichüen ölkisi tewelikide turuwatqan aba rayonidiki kirti ibadetxanisini muhasirige éliwalghili ikki hepte boldi.
Muxbirimiz weli
2011.04.23

Norwégiyidiki tibet teshkilatlirining tibet aptonom rayonidin we kirti ibadetxanisidin éniqlighan ehwallargha asasen bayan qilishiche, xitay saqchiliri peyshenbe küni kech sa'et 9 da, kirti ibadetxanisigha bésip kérip, öymu-öy axturup, rahiblardin 300 ni tutup ketken.

Jüme küni, xitay saqchiliri yene kélip, pütünley kanap bilen oralghan aptomobillirini sirtta toxtitip qoyup, ibadetxanigha kirip ketken.

Birleshme agéntliqining béyjingdin bayan qilishiche, xitay saqchiliri bilen tibetlerning kirti ibadetxanisidiki radiplar otturisida yüz bergen toqunushta ikki rahib öltürülgen.

Amérika awazi ashkarilighan widé'o matériyalliridin qarighanda, 3‏-ayning 16-küni mushu ibadetxanining aldida 20 yashliq rahib punso özige ot qoyup ölgende, bu ibadetxanidiki 2 mingdin artuq rahib alliqachan xitay saqchilirining qorshawi astida qalghan.

Emma xitay hazirgha qeder bu ibadetxanini qoralliq qisimliri bilen qorshiwalghanliqini iqrar qilmaydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.