Уйғур елидики алаһидә сақчи қисимлириниң туюқсиз һәрикәтләргә “дәл вақтида вә қаттиқ зәрбә бериш” иқтидарини ашуруши тәләп қилинди

Хитай даирилири уйғур елидики қораллиқ алаһидә сақчи қисимлириниң туюқсиз вәқәләрни бир тәрәп қилиш иқтидарини ашурушини тәләп қилди.
Мухбиримиз ирадә
2012.02.23

Шинхуа агентлиқидин берилгән хәвәрдин мәлум болушичә, 21-феврал күни уйғур ели миқяси бойичә вәзипә өтәватқан алаһидә сақчи қисимларниң кейинки 3 йиллиқ хизмәтлирини орунлаштуруш хизмәт йиғини чақирилған. Йиғинда уйғур районлуқ партком даимий әзаси шуң шуәнго сөз қилип, алаһидә сақчи қисимлирини уйғур елидә йүз бәргән һәрқандақ туюқсиз вәқәгә дәл вақтида вә қаттиқ зәрбә берип муқимлиққа капаләтлик қилишқа, террорлуққа қарши күрәш қилиш үчүн алаһидә җәң қилиш иқтидарини йетилдүрүшкә чақирған.

Даириләр 2005-йилидин башлап, қораллиқ алаһидә сақчи қисимлирини күчләндүргән болуп, улар уйғурларниң һөкүмәткә наразилиқ билдүрүп қилған һәрқандақ һәрикитини “туюқсиз вәқә, террорлуқ паалийәт” дегән нам астида бастурулуп кәлмәктә. 2011-Йилиниң ахирида хотән мокуйла йезисида аяллар вә балиларниму өз ичигә алған бир гуруппа киши чеградин қачмақчи болғанда әдлийә органлириниң суал-сориқисизла сақчиларниң қораллиқ һуҗум қилишиға учрап еғир өлүм-йетим вәқәси көрүлгән иди. Көзәткүчиләр, шуң шунгониң туюқсиз вәқәләргә “дәл вақтида вә қаттиқ зәрбә бериш” чақириқини юқириқидәк сотсиз өлүм вәқәлириниң бундин кейинму йүз беридиғанлиқиниң испати, дәп қаримақта.

Гәрчә хәлқара кишилик һоқуқ органлири хитай һөкүмитини уйғур елидики қораллиқ бастуруш һәрикәтлирини аяғлаштурушқа чақириватқан болсиму, әмма уйғур ели даирилири давамлиқ һалда уйғур елидики һәрқайси дәриҗилик қораллиқ қисим, чегра мудапиә қисим, алаһидә сақчилар санини көпәйтишни вә уларниң һоқуқ даирилирини кеңәйтишни давам қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.