"Шинҗаң партийә комитети" уйғур елидики алий мәктәп пүттүргәнләрни икки йилда ишқа орунлаштурмақчи

5-Июл вәқәсидин кейин хитай һөкүмитиниң уйғур елидики бир қатар истратегийилик пиланлири ишқа ашурулуватқан бу күнләрдә, уйғур аптоном районлуқ коммунистик партийә комитети мәхсус алий мәктәп пүттүргән яшларни ишқа орунлаштуруш мәсилиси бойичә партком даимий һәйитиниң йиғинини чақирған болуп, йиғинда икки йил ичидә уйғур елидики алий вә оттура техником пүттүргәнләрни асасий җәһәттин ишқа орунлаштуруп болушни оттуриға қойған.
Мухбиримиз үмидвар
2010.12.22

Тәңритағ ториниң бу хәвиридә ейтилишичә, партком секретари җаң чүншйән риясәтчилик қилған 21- декабир күнидики йиғинда оқуш пүттүргәнләрни ишқа орунлаштуруш мәсилиси мәхсус музакирә қилинған.

Хәвәрдә ейтилишичә, оқуш пүттүргәнләрни ишқа орунлаштуруш мәсилиси бойичә партком  7-нөвәтлик қурултийиниң 9-қетимлиқ кеңәйтилгән йиғини орунлаштуруш елип барған болуп, икки йил ичидә хизмәтсиз туруватқан оқуш пүттүргән студентларниң ишқа орунлишишини асасән әмәлгә ашуруш бекитилгән.

Хәвәрдә тәкитлинишичә , бу йил 11-айниң ахириғичә 76 миң нәпәр алий вә оттура техником пүттүргәнләр ишқа орунлаштурулған. Әмма, һазирғичә йәнә 75 миң оқуш пүттүргән студент ишсиз болуп, уларниң мәсилиси техи һәл қилинмиған. Хәвәрдә әскәртилишичә, бу санға 2010-йили оқуш пүттүргәнләр кирмигән.

Хәвәрдә көрситилишичә , мәзкур кеңәйтилгән йиғин йәнә 22 миң нәпәр аз санлиқ милләттин келип чиққан адәттики алий мәктәпләрни пүттүргән яшни шинҗаңға ярдәм бериш пиланиға киргән шәһәрләргә икки түркүм бойичә әвәтип тәрбийиләш елип бериш, шу арқилиқ "уларниң көз қаришини өзгәртиш, сапаси вә кәспий қабилийитини өстүрүп, уларниң җуңхуа миллити ортақ чүшәнчисини күчәйтиш" ни қарар қилған.

Дуня уйғур қурултийи вә башқа хәлқаралиқ кишилик һоқуқ тәшкилатлириниң мәлумат беришичә, өткән йилидики 5-июл вәқәсигә қатнашқанларниң хели көп қисми алий мәктәп пүттүрүп, ишсиз қалған уйғур яшлири икәнлики мәлум. Қоллирида җуңхуа хәлқ җумһурийитиниң қизил байриқини көтүрүп, өз инсанлиқ һоқуқини тәләп қилип тинч йосунда кочиға чиққан бу яшлар бастуруш вә тутқун қилинишқа учриған иди. Уйғур яшлири арисидики ишсизлиқ җәмийәттики омумйүзлүк наразилиқларниң бир мәнбәсигә айлиниватқанлиқи мәлум болмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.