Америка иранниң саһибханлиқидики сүрийә мәсилиси бойичә теһран йиғинини тәнқид қилди

Америка пәйшәнбә күни теһранда чақирилған сүрийә мәсилиси бойичә 29 дөләт йиғинини тәнқидләп, бу йиғинға башар әсәдни қоллап, униң өз хәлқини қирғин қилишиға ярдәм қиливатқан иранниң саһибханилиқ қилиши гуманлиқ икәнликини билдүргән.
Мухбиримиз әркин
2012-08-10
Share

Пәйшәнбә күни чақирилған йиғинға русийә, хитай, ирақ, венезуела қатарлиқ дөләтләр тәклип қилинип, америка вә униң явропа иттипақи, түркийә, сәуди әрәбистан, қатар қатарлиқ иттипақдашлири тәклип қилинмиған иди.

Ақсарай баянатчиси җәй карней пәйшәнбә күни мухбирларниң мәзкур йиғинға қандақ қарайдиғанлиқи һәққидики соалиға җаваб берип: иранниң башар әсәдни қоллап, униң өз хәлқини қәтли қилишиға ярдәм қилғанлиқини испатлайдиған нурғун пакитлар бар, дегән.

Лекин иран, мәзкур йиғин арқилиқ сүрийә һөкүмити билән өктичи гуруһлар арисидики тинчлиқ сөһбитини қайта башлашни мәқсәт қилидиғанлиқини илгири сүргән. Иран ташқи ишлар министири ели әкбәр салеһи йиғиндин кейин мухбирларға тәкитләп: өктичиләрниң зор бир қисми сүрийә һөкүмити билән теһранда шәртсиз сөһбәт өткүзүшкә тәйяр икәнликини билдүрди, дәп көрсәткән.

Бирақ теһран йиғиниға қатнашмиған өктичиләр һазирға қәдәр салеһиниң сөзиниң тоғрилиқини испатлимиған.

Америкиниң б д т да турушлуқ баш әлчиси сузан райис түнүгүн иранни тәнқидләп, иранниң сүрийә тоқунушида "сәлбий рол" ойнаватқанлиқи, бирақ "вәзийәт өктичиләрниң пайдисиға өзгириватқанлиқи" ни билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт