Америка тибәт мәсилисигә алаһидә келиштүргүчи бәлгилиди

Америка ташқи ишлар министири һиларий клинтон ханим, тибәт вә хитай вәкиллири арисидики сөһбәткә алаһидә келиштүргүчи хадим бәлгиләнгәнликини елан қилди.
Мухбиримиз ирадә
2009-10-02
Share

Қарарға асасән, ташқи ишлар министири ярдәмчиси мария оттеро тибәт - хитай мәсилилири алаһидә келиштүргүчиси қилип бәлгиләнди. Бу қарарниң елан қилиниши хитайниң дөләт байрими 1 - өктәбиргә тоғра кәлди.

Америка дөләт мәҗлиси бу һәқтә елан қилған баянатида, оттеро ханимниң америка - хитай мунасивәтлиридики тибәт мәсилисигә алақидар сиясәт вә паалийәтләрни пиланлайдиғанлиқни оттуриға қойди.

Баянатта йәнә, оттеро ханимниң икки тәрәп арисидики диалогларниң муқим тәрәққий қилишиға капаләтлик қилиш билән бирликтә, тибәт хәлқиниң өзгичә мәдәнийитини сақлап қелиш үчүнму күч чиқиридиғанлиқи көрситилгән.
 
Хитай, америка һөкүмитиниң тибәт мәсилисигә тутқан позитсийисини изчил тәнқид қилип кәлмәктә иди. Техи алдинқи айниң оттурилирида обаманиң муһим баш мәслиһәтчилири дарамсалаға берип далай ламани зиярәт қилған болуп, хитай буниңғиму қаттиқ наразилиқ билдүргән иди.

Далай лама келәр һәптә америка пайтәхти вашингтонда зиярәттә болиду. У бу зияритидә америка президенти барак обама биләнму учришишини халайдиғанлиқини билдүргән иди.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт