Amérika maliye ministiri xitaygha xelq puli mesiliside bésim ishlitidighanliqini bildürdi

Amérika maliye ministirlikining ministiri timotiy géyténér "xitayning pul qimmitining ösüsh sür'iti intayin asta, perq intayin kichik" dédi. U bu sözlerni 16 - séntebir küni amérika dölet mejlisidiki ispat bérish yighinida qilghan bolup, u, xitayning xelq pulining qimmitining ösüsh sür'iti intayin asta bolghanliqtin, özining xitay hökümitini xelq pulining qimmitini ashurushqa mejburlaydighan tedbirler üstide oyliniwatqanliqini bildürgen.
Muxbirimiz irade
2010.09.16

U, "biz xitay bilen tijaret qiliwatqan bashqa döletlerge oxshashla xitay xelq puli qimmitining özgermey turuwérishidin ensirimektimiz" dégen we xelq'aradiki bashqa chong döletler bilen birlikte xitaygha bésim ishlitidighanliqini bildürgen.

Birleshme agéntliqining xewer qilishiche, géyténér bu yil 11 - ayda jenubiy koriyide élip bérilidighan 20 dölet rehberliri uchrishishida amérika we uning soda shériklirining xitaygha xelq puli qimmitini östürüsh heqqide bésim ishlitidighanliqini bildürgen.

Melum bolushiche, bu yil 6 - ayda xitay da'iriliri xelq pulining qimmitini asta - asta tengsheydighanliqi heqqide wede bergen, emma aridin bir qanche kün ötkendin kéyinla xelq puli qimmitini muqim tutushni qayta tekitligen idi.

B b s ning xewer qilishiche, amérika maliye ministirining bu qétimliq pozitsiyisi ilgirikige qarighanda bir qeder qattiq bolup, bu amérika hökümitining xitayning xelq puli mesilisige jiddiy qarawatqanliqini körsitip béridiken.
 
Xitay tashqi ishlar bayanatchisi bügünki muxbirlarni kütüwélish yighinida amérika maliye ministirining sözige qarita inkas qayturup, "xitaygha bésim ishlitish mesilini hel qilish tügül, téximu murekkepleshtürüwétidu", dédi.

 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.