Amérika mutexessisliri xitay herbiy emeldarlirining amérikigha qarita iqtisadiy émbargo qoyush teshebbusini agahlandurdi
Muxbirimiz mihriban
2010.02.10
2010.02.10
Xitayning yuqiri derijilik herbiy emeldarliridin, ju chéngxu we lo yüen qatarliqlar shinxu'a agéntliqi lyaw wang heptilik xewerler zhurnilining ziyaritini qobul qilghinida, amérikining teywen'ge qoral sétip bérishi xitayning sherqiy jenubtiki déngiz boyi rayonlirining bixeterlikige tehdit élip kelgenlikini, shunga amérikigha qarita iqtisadiy jehettin, bolupmu qerz pul jehettin émbargo qoyushni otturigha qoyghan.
Lo yüen qatarliqlarning teshebbusigha qarita amérika herbiy hem iqtisadiy mutexessisliri inkas qayturup, eger xitay amérikigha qarita iqtisadiy jehettin émbargo qoysa, aldi bilen xitayning özi éghir zerbige uchraydighanliqini agahlandurdi.
Amérikining meshhur herbiy ishlar obzorchisi jon paykning qarishiche, eger xitay amérikining xezine chékini sétiwélishni toxtatsa, bashqilarning zayomlarni sétiwalidighanliqi, xitayning hazirqi shara'itta özidiki kapitalni amérikigha meblegh sélish arqiliqla pulning xorap kétishining aldini alalaydighanliqini bildürdi.
Amérika oksford kulubining re'isi dawid féssérning qarishiche, eger xitay amérika xezine chékini sétiwélishni toxtatsa, heqiqeten buning amérika xezine chékige hem dollarning qimmitige tesir yetküzidighanliqi, lékin axirqi hésabta amérikida nurghun meblighi bar xitayning özi éghir ziyan tartidighanliqini agahlandurdi.