Kurt kempéll: amérika xitay bilen bolghan munasiwette négizlik qimmet qarishida ching turidu

Kurt kempéll yene, amérikining xitay bilen "ijabiy, omumi yüzlük we hemkarliq xaraktérlik munasiwet" ornitishni ümid qilidighanliqini eskertip, lékin xitay bilen bolghan sodidiki tengpungsizliqni tengsheshning zörürlükini tekitlidi.

Kempéll amérika dölet mejlisi tashqi munasiwetler komitétining charshenbe künki yighinida eskertip, amérika-xitay arisida kishilik hoquq, eqliy mülük hoquqi we xitay herbiy zamaniwilashturush qedimining ochuq - ashkare bolushi qatarliq bir qatar mesililerde yenila ixtilap barliqini ilgiri sürdi.

U mundaq deydu: "biz (xitaygha) yene shu bisharetni bérimiz, amérika özining istiratégiyilik menpe'eti we négizlik qimmet qarishida ching turidu. Shunga amérika bir qanche heptidin béri teywen munasiwet qanunigha asasen teywen'ge bir qisim qorallarni sétip bérishke qoshuldi. Prézidént obama tibet rohani dahisi dalay lama bilen uchrashti. Biz yene tedbir qollinip, dölet ishlar ministiri klinton otturigha qoyghan tor erkinlik mesilisini emilileshtürüshke tirishimiz".

Kempll bu sözlerni amérika mu'awin dölet ishlar ministiri stéynbérg xitayni ziyaret qiliwatqan mezgilde tekitligen bolup, kempéll dölet mejlisidiki sözide stéynbérgning xitay da'irilirigha "amérikining menpe'etining qeyerde ikenlikini ashkare éytidighanliqi"ni bildürdi.