Amérika Uyghur jem'iyiti bayanat élan qilip, amérikining yer shari térrorluqqa qarshi kürishini qollaydighanliqini bildürdi

Amérika Uyghur jem'iyiti jüme küni "11‏ - séntebir weqesi"ning 9 yilliqi munasiwiti bilen bayanat élan qilip, amérikining yer shari térrorluqqa qarshi turush kürishini qollaydighanliqini bildürdi.
Muxbirimiz erkin
2010-09-10
Élxet
Pikir
Share
Print

Bayanatta amérika yenila dunya xelqining erkinlik we ümid mesh'ili ikenlikini ilgiri sürgen. Bayanatta dunya Uyghur qurultiyi re'isi rabiye qadir xanimning sözini neqil keltürüp, " gerche bügün amérika hayatidin ayrilghan nurghun puqralarni we bu weqening pütkül amérikida peyda qilghan azabini unutmisimu, lékin amérika 11‏ - séntebir hujumining xarabiliqidin qayta des turdi" dep tekitligen.

Bayanatta yene mundaq deydu": Uyghur xelqi amérika hökümitining yer shari térrorluqqa qarshi turush kürishini qollaydu we biz démokratiye we kishilik hoquq peqet di'alog we tinchliq arqiliqla emelge ashidu hem ornitilidu dep hésablaymiz."

Bayanatta, xitay da'irilirining "11 -  séntebir weqesi"din kéyin, térrorluqqa qarshi turushni bahane qilip, özining Uyghurlargha qaratqan basturush siyasitini qanunlashturmaqchi bolghanliqini eyiblep, "xitay hakimiyiti Uyghur xelqining asasi kishilik hoquqini qoghdash we uning étirap qilinishini qolgha keltürüsh yolidiki kürishini meqsetlik zorawanliq we térrorluq heriket qilip körsitishni dawamlashturuwatidu" dégen.

Xitay hökümiti "11 - séntebir weqesi"din kéyin, térrorluqqa qarshi küreshte amérika bilen bir septe turidighanliqini élan qilip, xitayni térrorchiliqning ziyankeshlikige uchrighan döletlerning biri dep jakarlighan hem sherqiy türkistan islam herikitini térrorluq teshkilat, dep élan qilghan idi.

Amérika bolsa xitayning telipini qobul qilip, sh t i herikitini b d t xewpsizlik kéngishi we amérika dölet ishlar ministirliqining térrorluq teshkilatlar tizimlikige kirgüzgen idi.

Bezi analizchilar amérikining bu herikitini tenqidlep, "bu xitayning Uyghurlargha qaratqan basturushni kücheytishige yéshil chiraq yéqip bergenlik," dep eyibligen idi.

Toluq bet