Aqsuda qanunsiz diniy pa'aliyetlerge zerbe bérish namida 20 nechche adem qolgha élindi

Dunya Uyghur qurultiyi teminligen melumat hem radi'omiz igiligen uchurlardin melum bolushiche, ötken hepte aqsu wilayitide qanunsiz diniy pa'aliyetlerge zerbe bérish namida 20 nechche kishi qolgha élin'ghan.
Muxbirimiz méhriban
2011.12.27
Share on WhatsApp
Share on WhatsApp

Dunya Uyghur qurultiyi bayanatchisi dilshat rishit bu qétim xitay da'irilirining sherqiy türkistanning aqsu wilayitidiki tutqun qilish herikitide, saqchilarning 200din artuq Uyghur a'iliside kéchide tuyuqsiz axturush élip bérip, 60 nechche kishining soraq qilinip, 21 kishining qanunsiz diniy pa'aliyet bilen shughullan'ghan, qanunsiz neshr qilin'ghan diniy kitablar hem dunya Uyghur qurultiyi re'isi rabiye qadir bilen sabiq amérika prézidénti boshning bille chüshken süritini saqlighan dégen jinayet bilen qolgha élin'ghanliqini bildürdi.

Radi'omiz seyshenbe küni aqsu shayar nahiyisidiki melum saqchixanigha téléfon qilip ehwal igiliginimizde, saqchi xadimi yéngi yildin ilgiri aqsu teweside élip bérilghan qanunsiz diniy pa'aliyetlerge zerbe bérish herikitide, hökümetning ruxsitisiz köchürüp tarqitilghan diniy ün-sin buyumliri hem rabiye qadirgha munasiwetlik sin'alghu we resimler qolgha chüshkenlikini, nöwette bu délogha chétishliq kishilerning tutup turuluwatqanliqini, qanunsiz diniy pa'aliyetlerge hem qanunsiz neshr buyumlirigha zerbe bérish herikitining dawamlishiwatqanliqini bildürdi.

Nöwette Uyghur élide yene bir qétimliq qattiq zerbe bérish herikiti dawamlishiwatqan bolup, Uyghur aptonom rayonining partkom sékrétari jang chünshyen 24-dékabir échilghan “Muqimliqni saqlash yighini” da rayon weziyitining murekkeplikini tekitlep, qanunsiz diniy pa'aliyetler hem diniy radikallargha dawamliq zerbe bérip, rayon muqimliqigha kapaletlik qilishni telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.