Araltöpidiki tagh gümürülüp chüshüsh weqesidin kéyin, da'iriler xeterlik kanlarni közdin kechürüshke bashlighan

Xitay axbarat wasitilirining xewer qilishiche, künes nahiyisining araltöpe baziridiki bir tömür kénida 31-iyul küni tagh gümürülüp chüshüp, 20 nechche adem ölgendin kéyin, yerlik da'iriler ili jilghisidiki bu xil “Gé'ologiyilik apet” yüz bérish yoshurun xewpi mewjut xeterlik orunlarni közdin kechürüp, tedbir élishqa bashlighan.

Muxbirimiz erkin
2012-08-06

Shinxu'a agéntliqining bu heqtiki xewiride, ilining künes, tékes, toqquztara, mongghulküre qatarliq nahiyiliridiki “Gé'ologiyilik apet” yüz bérish yoshurun xewpige ige 739 orun tekshürülüp chiqip tedbir élin'ghanliqi, 761 a'ilining köchürülgenliki ilgiri sürülgen.

Biraq, araltöpe tömür kénida 31-iyul weqe yüz bérip, tagh astida qalghan kishilerni qutquzush xizmiti ötken hepte yamghur sewebidin toxtap qalghandin buyan, yekshenbe künige qeder eslige kelmigen. Da'iriler ötken jüme küni tagh astida qalghan 28 kishidin 21 kishining jesiti tépilghan bolsimu, biraq qalghan 7 kishini izdep tépish xizmiti yöl yéghin seweblik tosqunluqqa uchrighanliqini bildürgen idi.

Mezkur weqe Uyghur tenqidchiler we muhitni qoghdighuchilarning diqqitini qozghighan idi. Ular da'irilerning weqeni “Gé'ologiyilik apet” dep atap, uninggha tebi'iy apet tüsi bérishke urun'ghanliqini, bu arqiliq mes'uliyettin qachqanliqini tenqid qilghan.

Ularning ilgiri sürüshiche, 31-iyul tagh gümürülüsh weqesi, künes qatarliq gé'ologiyilik yer qatlimi yumshaq jaylarda kan échip, yerning gé'ologiyilik qurulmisigha buzghunchiliq qilghan shirket we yerlik da'irilerning herikiti keltürüp chiqarghan “Sün'iy apettur.”