Уйғур елидә ашлиқ баһаси 10 йил ичидә үч һәссидин артуқ өсүп кәтти

Үрүмчидин игилигән учурлардин мәлум болушичә, йеқинқи 10 йил ичидә һөкүмәт орунлиридики хизмәтчиләрниң мааши мәлум нисбәттә өстүрүлгән, намрат деһқанлар вә шәһәрдики ишсиз аһалиләргә ейиға 60 сомдин төвән капаләтлик ярдәм пули бериливатқан болсиму, әмма бу шиддәт билән өрләватқан мал баһасидин көп төвән болған.
Мухбиримиз меһрибан
2012.09.21

Уйғурларниң билдүрүшичә, үрүмчидә 25 килограм халтилиқ унниң баһаси 2002-йилдики 25 сомдин өрләп, һазирқи 88 сомға өскән. Бир килограм қой гөшниң баһаси 50 сомға өскән. Башқа йемәк-ичмәк, көктат қатарлиқларниң баһасиму бу 10 йил ичидә шиддәт билән өрлигән.

Хитайниң яшин ториниң хәвиридин мәлум болушичә, 8-9- ай ичидә уйғур елидики үрүмчи қатарлиқ шәһәрләрдә ашлиқ баһаси йәнә 5٪ өсүп, 25 кило унниң баһаси 88 сомдин 91 сом арилиқида болған.

Уйғур елидә шиддәт билән өрләватқан мал баһаси аһалиләрни әндишигә салған. Радиомиз зияритини қобул қилған уйғурлар бу хил әһвалға болған наразилиқини билдүрүп, шинҗаңға ярдәм бериш намида, районда көплигән хитай ширкәтлириниң йәрлишип, түркүм-түркүмләп хитай көчмәнлириниң йөткилиши, бу земинниң әсли игилири болған уйғур қатарлиқ йәрлик хәлқләрниң ишсизлиқ нисбитини ашурувәткәнликини, уйғурларға қаритилған диний етиқад, өрп-адәт, тил-маарип җәһәттики бесимлардин башқа, уйғурларниң әң төвән еһтияҗи болған тирикчилик муһитиниңму тарийип кәткәнликини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.