Хитай ахбарат васитилири ху җинтавниң кишилик һоқуқ һәққидики сөзини хәвәр қилмиди

Хитай дөләт рәиси ху җинтавниң америка зиярити җәрянида хитайдики кишилик һоқуқ мәсилисигә аит қилған сөзи хитай ахбарат васитилиридә тарқитилмиған.
Мухбиримиз ирадә
2011-01-20
Share

Хитай дөләт рәиси ху җинтавниң бу қетимлиқ америка зиярити болупму бу қетимлиқ зиярәттә президент обаманиң диктатор бир рәһбәр билән елип барған учришишида кишилик һоқуқ мәсилисини оттуриға қойидиған яки қоймайдиғанлиқи, шүбһисизки бу қетимлиқ учришишниң әң қизиқ нуқтиси болған иди.

Дунядики һәрқайси дөләтләрниң ахбарат васитилири икки рәһбәрниң учришиши вә ақсарай сиртида елип берилған наразилиқ намайишлириға кәң көләмдә йәр берип, обаманиң хитайға кишилик һоқуқ мәсилисидә қилған сөзини алаһидә гәвдиләндүрди.

Франсийә агентлиқиниң хәвәр қилишичә, хитай ахбарат васитилириму ху җинтавниң бу қетимлиқ америка зияритигә алаһидә йәр бәргән болсиму, әмма улар өз хәвәрлиридә хитайниң дунядики йүксиливатқан бир күч икәнлики, униң дуня сиясити вә иқтисадидики орниниң қанчилик муһимлиқидәк нуқтиларни гәвдиләндүрүшкә тиришқан.

Хәвәрләрдә ху җинтавниң обама билән көрүшүватқан вақти, обаманиң хуға бәргән зияпити вә икки тәрәп имзалиған келишимләр давамлиқ тәкитләнгән. Әмма ху җинтавни тәрләткән инсан һәқлири мәсилилиригә аит қисми болса кесип ташланған.

Хитай дөләт рәиси ху җинтав президент обама билән мухбирларни күтүвалғанда қилған сөзидә, хитайниң кишилик һоқуқ мәсилисини иқрар қилип: " биз инсан һәқлириниң универсаллиқини етирап қилимиз вә ишинимиз. Әмма, һазир җуңго иқтисад тәрәққият басқучида нурғунлиған хирисларға дуч кәлмәктә. Әлвәттә җуңгода кишилик һоқуқни тәрәққий қилдуруш үчүн қилишқа тегишлик нурғун ишлар бар" дегән иди.

Игилинишичә, һөкүмәт авази болған с с т в башлиқ һәрқайси ахбарат органлири ху җинтавниң бу сөзлирини хәвәрләрдә елан қилмиған. Әмма, хоңкоңдики бир қисим ахбарат орунлири буни хәвәр қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт