Amérika afghanistanning bedexshan ölkiside yasawatqan yol xitayni endishige salmaqta

Xitayning yer shari gézitide bu yol heqqide bérilgen xewerde déyilishiche, yéza igilikni asas qilghan bedexshan ölkiside yasiliwatqan bu yolgha meblegh salghan amérika shirkitining xizmetchi xadimliri hindistanliqlar hem koriyiliklerdin terkip tapqan bolup, yol nahayiti süpetlik yasiliwatmaqta iken.

Yer shari gézitide bu yolning istratégiyilik qimmiti heqqide toxtilip, "déhqanchiliqni asas qilghan, sana'et ishlepchiqirishi bolmighan, at - ulaghni asasiy qatnash qorali qilidighan bedexshan ölkiside bundaq bir yolning yasilishi elwette afghanistanning iqtisadiy tereqqiyati üchünla bolmisa kérek"dep yézilghan.

Yer shari gézitining muxbiri yene, özining bedexshan rayonida shimaliy atlantik ehdi teshkilatigha qarashliq gérmaniye armiyisining herbiy aptomobillirini körgenlikini, bu yolning xitay chégrisidiki waxan karidorigha tutishidighanliqini bayan qilip, "xitay hökümiti shimaliy atlantik ehdi teshkilatining waxan karidori arqiliq afghanistan'gha urush eshyalirini toshush telipini ret qilghandin kéyin, shimaliy atlantik ehdi teshkilati bir istratégiyilik yolni xitayning ishiki aldighila yasimaqta " dep yazghan. Xewerde yene, xitayning waxan karidorining xitay chégrisi ichidiki dölet mudapi'e yol bölikinimu jiddiy rémont qiliwatqanliqi yézilghan.