Bush eslimiside iraqta bi'ologiyilik qorallar barliqi heqqide misir prézidénti mubarekning xewer yetküzgenlikini ilgiri sürdi

Bushning "qarar nuqtiliri" namliq eslimiside eskertishiche, hüsni mubarek amérika armiyisining eyni chaghdiki générali tomiy frankqa melumat bérip, "iraqta bi'ologiyilik qorallar bar we uni amérika qisimlirigha ishlitishi mumkin" dégen.

Bush eslimiside yene, "hüsni mubarekning ereb jama'etchilikidin ensirep, bu uchurning ashkarilinip kétishidin qorqqanliqi"ni bildürgen. Uning eskertishiche, misir prézidénti teminligen bu axbarat uning qandaq qarar chiqirishigha xéli zor tesir körsetken. Bush yene, diplomatik urunushlarning dégendek ishqa yarimighanliqini eskertip, bu amérikining ottura sherqtiki se'udi erebistan'gha oxshash ittipaqdashlirida ensizlik yaratqanliqini bildürgen.

Bushning ilgiri sürüshiche, bir küni se'udi erebistan bash elchisi shahzade bender bushning ishxanisigha kélip, ottura sherqtiki ittipaqdash döletler amérikining bir qarargha kélishini telep qilidighanliqini éytqan.

Bush yene, özining iraqqa hujum qilish qararini chiqirishida, natséstlar gérmaniyisining 2‏ - dunya urushi mezgilidiki yehudilargha qaratqan chong qirghinchiliqidin aman qalghan, nobél tinchliq mukapati sahibliridin éllié wéysélning chongqur tesirige uchrighanliqini bildürgen.

Bushning eskertishiche, élié wéysél sadam hüseyinning wehshilikini natséstlar qirghinchiliqi bilen sélishturup, "sizning sheytan'gha qarshi turush exlaqiy mejburiyitingiz bar" dep xet yazghanliqini bildürgen. Lékin, bush eslimiside özining iraqqa hujum qilish qararini aqlap, özining toghra qarar chiqarghanliqigha peqet tarixning baha béridighanliqini ilgiri sürgen.

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar