Буш әслимисидә ирақта биологийилик қораллар барлиқи һәққидә мисир президенти мубарәкниң хәвәр йәткүзгәнликини илгири сүрди

Сабиқ америка президенти җорҗ буш өзиниң йеңидин нәшр қилип тарқитилған әслимисидә ашкарилап, сабиқ ирақ президенти садам һүсәйиндә биологийилик қораллар барлиқиға даир учурни мисир президенти һусни мубарәк тәминлигәнликини илгири сүргән.
Мухбиримиз әркин
2010-11-11
Share

Бушниң "қарар нуқтилири" намлиқ әслимисидә әскәртишичә, һүсни мубарәк америка армийисиниң әйни чағдики генерали томий франкқа мәлумат берип, "ирақта биологийилик қораллар бар вә уни америка қисимлириға ишлитиши мумкин" дегән.

Буш әслимисидә йәнә, "һүсни мубарәкниң әрәб җамаәтчиликидин әнсирәп, бу учурниң ашкарилинип кетишидин қорққанлиқи"ни билдүргән. Униң әскәртишичә, мисир президенти тәминлигән бу ахбарат униң қандақ қарар чиқиришиға хели зор тәсир көрсәткән. Буш йәнә, дипломатик урунушларниң дегәндәк ишқа яримиғанлиқини әскәртип, бу америкиниң оттура шәрқтики сәуди әрәбистанға охшаш иттипақдашлирида әнсизлик яратқанлиқини билдүргән.

Бушниң илгири сүрүшичә, бир күни сәуди әрәбистан баш әлчиси шаһзадә бәндәр бушниң ишханисиға келип, оттура шәрқтики иттипақдаш дөләтләр америкиниң бир қарарға келишини тәләп қилидиғанлиқини ейтқан.

Буш йәнә, өзиниң ираққа һуҗум қилиш қарарини чиқиришида, натсестлар германийисиниң 2‏ - дуня уруши мәзгилидики йәһудиларға қаратқан чоң қирғинчилиқидин аман қалған, нобел тинчлиқ мукапати саһиблиридин еллие вейселниң чоңқур тәсиригә учриғанлиқини билдүргән.

Бушниң әскәртишичә, елие вейсел садам һүсәйинниң вәһшиликини натсестлар қирғинчилиқи билән селиштуруп, "сизниң шәйтанға қарши туруш әхлақий мәҗбурийитиңиз бар" дәп хәт язғанлиқини билдүргән. Лекин, буш әслимисидә өзиниң ираққа һуҗум қилиш қарарини ақлап, өзиниң тоғра қарар чиқарғанлиқиға пәқәт тарихниң баһа беридиғанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт