Xitayning chaghinida muhit éghir derijide bulghandi

Xitayda chaghan mezgilide étilghan salyotlardin chiqqan exlet we uningdin chiqqan is -tütek muhitni éghir derijide bulghighan. Béyjing waqti gézitining xewiridin melum bolushiche, peqet béyjing shehirining özidila 80 ming tonna exlet yighilghan bolup, bu exletlerni tazilash üchün jem'iy 23 ming taziliq ishchisi ishligen.
Muxbirimiz irade
2010-02-18
Élxet
Pikir
Share
Print

Igilinishiche yene, bu yil étilghan salyotlardin kélip chiqqan exletning miqdari ötken yilgha qarighanda 11 tonna artqan.

Xitay muhitni éghir derijide bulghawatqan dölet bolush süpiti bilen izchil halda xelq'araning tenqidige uchrap kéliwatqan bolup, 2009 - yili kopinhagénda échilghan xelq'ara kilimat yighinidimu dunyagha eng köp parnik gazi qoyup bériwatqan döletlerning biri bolghan xitayni bashqa döletler kilimat söhbitide aktip bolmasliq bilen eyibligen, hetta en'giliyining muhit ishlirigha mes'ul ministiri éd milliband en'giliyide chiqidighan gardiyan gézitidiki maqaliside, xitayni kilimat yighinida qarar chiqirishqa tosqunluq qilish bilen eyiblep, "xitay kilimat söhbitini görüge éliwélishqa urundi" dégen idi.

Radi'omiz igiligen xewerlerge qarighanda, ürümchide chaghan bayrimi munasiwiti bilen étilghan salyotlar tüpeylidin ürümchi asminini qapliwalghan is - tütek uzun'ghiche yoqimighan bolup, bu xil ehwal ürümchidiki bashqa millet ahaliliri arisida naraziliq peyda qilghan. Chünki ürümchining muhiti bulghinish derijisi eslidila nachar bolghachqa, bolupmu qish künliri ürümchidiki par qazanlirining qalaymiqan bolushi, da'irilerning muhit mesilisige bolghan tonushining töwen bolushi seweblik ürümchi asminini qilin is - tütek qaplap kétidighan bolup, bu xil ehwal kishilerning salametlikige éghir tehdit peyda qilmaqta iken.

Toluq bet