Chéchen herikitining lidéri: rusiyige qarita hujumlirimizni dawam qilimiz

Bügün rusiyining jenubidiki daghistanda yene partlash weqesi yüz bergen. Rusiye xewer agéntliqlirining bildürüshiche, bomba qachilan'ghan bir aptomobilning partlishi bilen meydan'gha kelgen weqede ikki kishi hayatidin ayrilghan, bir kishi éghir yarilan'ghan.
Muxbirimiz irade
2010-04-01
Share

Rusiyide kéyinki künlerde meydan'gha kelgen 4 - qétimliq bu partlash weqesining rusiyidiki métro partlitish weqesi bilen chétishliq ikenliki ilgiri sürülmekte. 29 - Mart küni moskwaning métro istansisida arqa - arqilap  2 qétim adem bomba partlash weqesi yüz bérip 39 kishi hayatidin ayrilghan, arqidinla rusiye fédératsiyisige qarashliq daghistanda saqchi ponkitida adem bomba hujumi yüz bérip, 9 i saqchi 12 kishi hayatidin ayrilghan idi.

Bu bir hepte ichide élip bérilghan adem bomba hujumlirini bügün chéchen herikitining lidéri doku ömerof öz üstige aldi. U rusiyige qarita bu xil hujumlarning bundin kéyinmu dawam qilidighanliqini eskertti. Doku ömerof widi'o léntisige qilghan sözide, bu hujumlarning rusiye herbiy da'irilirining 11 - féwralda chéchenistanda élip barghan heriketlirige bérilgen jawab ikenlikini bildürüp: "rus eskerliri 11 - féwralda chéchenistanning ashtam kentide kembeghel bigunah xelqlerni öltürdi. Buninggha héchkim bir nerse démidi. Shuninggha qesem qilimenki, rus xelqi emdi urushni téléwizor we radi'odin anglimaydu. Hujum emdi ularning ishikining aldighiche kélidu. Ular emdi urushni öz közi bilen köridu, wujudida hés qilidu, chünki rus xelqi bügün'giche kawkaziyide boluwatqan tengsizliklerge süküt qilip keldi," dégen.

Roytérs agéntliqining xewer qilishiche, rusiye prézidénti dimitriy médmédéw peyshenbe küni shimaliy kawkaziye rayonigha tuyuqsiz ziyaret élip bérip, térrorisitlargha qattiq zerbe bérishni tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet