Чегрисиз мухбирлар тәшкилати, хитай даирилириниң 2 нәпәр тибәт журналистни қолға алғанлиқини әйиблиди

Чегрисиз мухбирлар тәшкилати дүшәнбә күни баянат елан қилип, хитай даирилириниң икки нәпәр чиңхәйлик тибәтликни, жорнал чиқирип мақалә язғанлиқ сәвәбидин қолға алғанлиқини әйиблиди вә уларниң дәрһал қоюп берилишини тәләп қилди.
Мухбиримиз әркин
2010.09.06
Share on WhatsApp
Share on WhatsApp

Мәркизи париждики мухбирлар һоқуқини қоғдиғучи мәзкур тәшкилат, будда вә калсаң җинпа исимлик бу икки тибәтликниң "бөлгүнчилик" билән әйиблинип, бу йил 6‏ - вә 7 - айда айрим - айрим қолға елинғанлиқини илгири сүрди.

Бу йил 34 яшлардики будда исимлик тибәтлик яш йеза дохтури болуп, чуәнчидики бир тиббий мәктәпни пүттүргән. Бу йил 35 яшлар әтрапидики калсаң җинпа исимлик йәнә бир тибәтлик бу йил 7 - айниң 21 - күни қолға елиниду. У бурун чиңхәйдики бир ибадәтханиниң раһиби болуп, бир мәзгил һиндистанда оқуғандин кейин 1996‏ - йили юртиға қайтқан. Улар тибәт тилидики "шар дуң ри" намлиқ журналниң тәһрирликини қилиш, "дурап кйи на " намлиқ журналда мақала елан қилиш билән әйибләнгән.

Чегрисиз мухбирлар тәшкилатиниң вәқәдин хәвәрдар мәнбәләрдин нәқил кәлтүрүшичә, даириләр будда билән калсаң җинпани зиялийлар арисида "бөлгүнчилик"идийиси тарқитиш, 2008‏ - йили 3 - март ейидики лахаса вәқәси һәққидә мақалә йезип, бастуруш елип берилғанлиқини алға сүрүш билән әйиблигән.

Чегрисиз мухбирлар тәшкилати йәнә хитай даирилириниң йеқиндин бери тибәт журналистлириға қаратқан бастурушни күчәйткәнликини әскәртип, нөвәттә 15 нәпәр тибәтлик журналист вә язғучиниң түрмидә йетиватқанлиқини, ташқириға учур йоллаш билән әйиблинип қолға елинған тибәтләрниң 50 кә йетидиғанлиқини билдүргән.

Йеқинда хитай даирилири сонам ринчен вә яргай исимлик икки нәпәр тибәтлик толуқ оттура мәктәп оқуғучисини оқуғучилар журнили чиқирип, һөкүмәтниң тибәт сияситини тәнқид қилидиған мақалиләрни басқанлиқи сәвәбидин тутқун қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.