Chégrisiz muxbirlar teshkilati, xitay da'irilirining 2 neper tibet zhurnalistni qolgha alghanliqini eyiblidi

Chégrisiz muxbirlar teshkilati düshenbe küni bayanat élan qilip, xitay da'irilirining ikki neper chingxeylik tibetlikni, zhornal chiqirip maqale yazghanliq sewebidin qolgha alghanliqini eyiblidi we ularning derhal qoyup bérilishini telep qildi.
Muxbirimiz erkin
2010.09.06
Share on WhatsApp
Share on WhatsApp

Merkizi parizhdiki muxbirlar hoquqini qoghdighuchi mezkur teshkilat, budda we kalsang jinpa isimlik bu ikki tibetlikning "bölgünchilik" bilen eyiblinip, bu yil 6‏ - we 7 - ayda ayrim - ayrim qolgha élin'ghanliqini ilgiri sürdi.

Bu yil 34 yashlardiki budda isimlik tibetlik yash yéza doxturi bolup, chu'enchidiki bir tibbiy mektepni püttürgen. Bu yil 35 yashlar etrapidiki kalsang jinpa isimlik yene bir tibetlik bu yil 7 - ayning 21 - küni qolgha élinidu. U burun chingxeydiki bir ibadetxanining rahibi bolup, bir mezgil hindistanda oqughandin kéyin 1996‏ - yili yurtigha qaytqan. Ular tibet tilidiki "shar dung ri" namliq zhurnalning tehrirlikini qilish, "durap kyi na " namliq zhurnalda maqala élan qilish bilen eyiblen'gen.

Chégrisiz muxbirlar teshkilatining weqedin xewerdar menbelerdin neqil keltürüshiche, da'iriler budda bilen kalsang jinpani ziyaliylar arisida "bölgünchilik"idiyisi tarqitish, 2008‏ - yili 3 - mart éyidiki laxasa weqesi heqqide maqale yézip, basturush élip bérilghanliqini algha sürüsh bilen eyibligen.

Chégrisiz muxbirlar teshkilati yene xitay da'irilirining yéqindin béri tibet zhurnalistlirigha qaratqan basturushni kücheytkenlikini eskertip, nöwette 15 neper tibetlik zhurnalist we yazghuchining türmide yétiwatqanliqini, tashqirigha uchur yollash bilen eyiblinip qolgha élin'ghan tibetlerning 50 ke yétidighanliqini bildürgen.

Yéqinda xitay da'iriliri sonam rinchén we yargay isimlik ikki neper tibetlik toluq ottura mektep oqughuchisini oqughuchilar zhurnili chiqirip, hökümetning tibet siyasitini tenqid qilidighan maqalilerni basqanliqi sewebidin tutqun qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.