Чоңчиңда һәрбий газармиға һуҗум қилип әскәр өлтүрүш вә қорал булаш вәқәси йүз бәргән

Хитайчә бошүн ториниң хәвәр қилишичә, бүгүн пәйшәнбә күни кәч саәт 8 әтрапида, хитайниң чоңчиң шәһиридики бир һәрбий газарма уштумтут һуҗумға учриған.
Мухбиримиз шөһрәт һошур
2009.03.19

Һуҗумчи яки һуҗумчилар, газармида постта туриватқан бир нәпәр әскәрни өлтүрүп, әскәрниң қолидики қорал вә оқ - дорини елип қачқан.

Хәвәрдә билдүрүлишичә, даириләр һуҗумниң пиланлиқ вә пухта тәйярлиқ билән елип берилғанлиқини пәрәз қилип, чоңчиң шәһири ичидә җиддий тәкшүрүш елип бармақта.

Хитайда һәрбий газармиларниң һуҗумға учраш вәқәси наһайити аз учрайдиған әһвал болуп, бултур қәшқәрдә йүз бәргән 4 ‏ - авғуст сәмән йоли вәқәсиму сәмәнйолидики һәрбий газарминиң алдида йүз бәргән.

Вәқәдә уйғур яшлири абдурахман азат билән қурбанҗан һемит газарма алдидики йолда йүгүрүп кетиватқан хитай әскәрлиригә арқисидин һуҗум қилип, 17 әскәрни өлтүргән вә 16сини яриландурған иди.

Бүгүн чоңчиң шәһиридә йүз бәргини, бу шәһәрдә һәрбий газарминиң тунҗи қетим һуҗумға учришидур. Нөвәттә хитайдики түрлүк иҗтимаий мәсилиләр сәвәблик, бу йил ичидә хитайда бирәр аммивий исян чиқип қелиши пәрәз қилиниватқан болғачқа, бүгүнки вәқә чоңчиң даирилирини җиддий әндишигә салған.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.