Chungching shehirining sabiq j x bashliqi wang lijün “Asiyliq qilish” qatarliq 4 xil jinayet bilen eyiblen'gen

Wang lijün bu yil 2‏-ayning bashliri amérikining chéngduda turushluq konsulxanisigha qéchip kiriwélip, dunyani zil-ziligha salghan idi. U, kompartiye siyasiy byuro ezasi, chungching partkom sékrétari bo shiley we uning ayali gu keyleyning qilmishlirini pash qilip, bo shileyning aghdurulushini keltürüp chiqarghan we rehberlik yadrosidiki hoquq talishish kürishini ötkürleshtürüwetken.

Wang lijünning pash qilishi astida bo shileyning ayali gu keyley qolgha élinip, bu yil 8‏-ayda enxuyning xéféy shehiride sotlan'ghan we ikki yil kéchiktürüp ölüm jazasigha höküm qilin'ghan idi. Nöwette bo shiley partiye ichidiki barliq wezipisidin qaldurulghan bolsimu, biraq u hazirgha qeder bir terep qilinmighan. Uning qandaq bir terep qilinidighanliqi kishiler yéqindin diqqet qiliwatqan qiziq téma.

Teptish mehkimisi eyibnamide wang lijünning “Xizmet waqtida wezipisini tashlap, chéngdudiki amérika konsulxanisigha qéchip kiriwélishi, asiyliq qilish jinayiti”, “Testiqsiz yaki yalghan testiqname yasap, téxnikiliq razwédka wasitilirini qanunsiz qollinishi hoquqni suyi'istémal qilish jinayiti shekillendürgenliki” ni ilgiri sürgen.

Uning sotqa tartilghanliqi del amérika dölet ishlar ministiri klinton xanim béyjingni ziyaret qiliwatqan mezgilde élan qilin'ghan idi.

Közetküchilerning bildürüshiche, béyjing bu arqiliq washin'gton'gha signal bérip, uning ichki siyasitige arilishishigha qarshi ikenlikini ipadiligen.