Dalay lama mesilisi hindistan bilen xitay arisida yene talash tartish qozghidi

Yéqinda xitay hindistanni dalay lamagha pa'aliyet soruni hazirlap bérish bilen eyiblep, xitay-hindistan chégra söhbitini bikar qilghandin kéyin, bu qétim dalay lamaning kalkuttada élip barghan pa'aliyiti xitay-hindistan arisida yene talash-tartish qozghidi.
Muxbirimiz erkin
2011-12-02
Share

Hindistan axbarat wasitilirining xewer qilishiche, xitayning kalkuttadiki konsulxanisi yéqinda hindistan gherbiy bén'gal shtatining hökümet bash katipi sré samar gosh ependige xet yézip, gherbiy bén'gal shtatining hökümet bashliqi we bash walisining dalay lama nutuq sözleydighan pa'aliyetke qatnashmasliqini telep qilghan.

Xitay elchixanisining xétide, eger shtat bash walisi we hökümet bashliqi dalay lamaning pa'aliyitige qatnashsa, junggo terep buni dalay lamaning "Junggogha qarshi meydani" ni qollighanliq, dep qaraydighanliqini ilgiri sürgen.

Biraq xitay konsulxanisining mezkur xéti bezi hindistan axbarat wasitilirining tenqidige uchrighan. "Hindistan waqti géziti" ning bu heqtiki xewiride xitay konsulxanisining herikiti "Diplomatik qa'ide-yosun'gha xilap" dep körsitilgen.

Gherbiy bén'gal walisi narayanan bolsa dalay lamaning peyshenbe küni élip bérilghan kalkuttadiki nutuq sözlesh pa'aliyitige qatniship, xitay terepning agahlandurushini diqqetke almighan. Hindistan axbarat wasitilirining bu heqtiki xewerliride xitay konsulxanisining xéti hindistan hökümitining naraziliqini qozghighanliqi, hökümetning diplomatik qanallar arqiliq xitay bilen zakunlashqanliqi ilgiri sürüldi.

Xitay yéqinda hindistanni dalay lamaning déngi déhlida xelq'ara diniy yighin échishigha yol qoyush bilen eyiblep, xitay-hindistan arisida ötken düshenbe küni échilidighan chégra söhbitini kéchiktürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet