Dalay lama: 'xitay hökümiti tibetni dozaxqa aylandurdi'

10 - Mart tibet rohaniy dahiysi dalay lamaning sürgün bolghanliqigha 50 yil bolghan xatire kün, bügün dalay lama bu munasiwet bilen,tibet sürgün hökümiti jaylashqan hindistanning daramsala rayonigha dunyaning her qaysi jayliridin yighilghan 10 mingdin artuq tibetliklerge bayanat bérip " 50 yildin buyan xitay hökümiti tibet xelqi üstidin teswirligüsiz basturush, qirghinchiliq yürgüzüp,tibetni yer sharidiki dozaxqa aylandurdi, tibette xitay teripidin öltürülgen tibetler az dégende yüz minggha yétidu " dep xitayni qattiq tenqid qilghan.
Muxbirimiz gülchéhre
2009-03-10
Share

Nöwette dalay lamaning bayanati xelq'araliq agéntliqlar hemde intérnét uchur wasitiliri arqiliq pütün dunya axbarat sahesini qaplidi.

Dunyaning her qaysi jayliridiki tibet pa'aliyetchiliri bügün jaylarda türlük xatirilesh, tebriklesh pa'aliyetlirini uyushturmaqta shundaqla her qaysi döletlerdiki xitay elchixaniliri aldida tibet pa'aliyetchilirining xitay hökümitining tibetni bésiwalghanliqigha qarshi naraziliq namayishliri dawam etmekte.

Bügün xitay da'irilirimu xelq'ara axbarat wasitilirigha tibet mesilisi heqqide jawab bérishke mejbur bolghan bolup, xitay tashqi ishlar bayanatchisi majawshü dalay lamaning bayanatlirini yalghan'gha chiqarghan we " dalay lama we uning junggo hökümiti üstidin yalghan yawidaq söz tarqatmaqta" dep eyibligen.

Roytérs we b b s hemde fransiye agéntliqlirida dalay lamaning bügünki bayanatliridin neqil élishiche, "dalay lama xitay hökümitining bulturdin bashlap tibette qanliq basturushni toxtatmidi, tibet xitay bilen xoshna,bizning kütidighinimiz qanunluq hoquq, heqiqiy aptonomiye " dégen.

B b s ning xewirige qarighanda xitay da'iriliri tibetlerning 50 yilni xatirilishi yaki birer weqe tughdurushining aldini élish üchün qattiq herbiy halet yürgüzgen. Shundaqla her qandaq chet'el agéntliqlirining tibetke kirishini chekligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet