Далай лама тибәт һәрикитиниң хитай билән болған диалогни давамлаштурушни тәләп қилди

Далай лама җүмә күни дарамсаладики қараргаһида бирләшмә агентлиқиниң зияритини қобул қилип, хитай билән болған сөһбәтниң нәтиҗигә еришишигә 10 - 20 йил вақит кетиши мумкинликини билдүргән. У, "нөвәттә сөһбәт мәғлубийәткә учриди. Лекин бу, кәлгүсидә сөһбәтниң нәтиҗә қазиниш мумкинчилики йоқлуқидин дерәк бәрмәйду" дегән.

Хитай һөкүмити 2002‏ - йилдин бери далай ламаниң вәкиллири билән 9 қетим сөһбәт елип барған болсиму, лекин сөһбәт әмәлий нәтиҗигә еришәлмигән иди. Далай лама хитай зиялийлириниң арисида тибәткә һесдашлиқ қилидиғанлар көпийиватқатлиқини, буниң бейҗиңниң сияситиниң өзгиришигә түрткә болуш еһтимали барлиқини әскәртип, хитай рәһбәрлириниң арисида тибәт сияситини өзгәртиш тәрәпдаридики заманға лайиқлашқан бәзи елементларниң барлиқини билдүргән.

Хәвәрләрдә, униң "биз 51 йил сақлисун, биз йәнә 10 - 20 йил сақлиялаймиз" дегәнликини язди. Далай лама 1990 ‏ - йилларда мустәқиллиқтин ваз кечидиғанлиқини елан қилған иди. Лекин у "бизниң мустәқиллиқ тәләп қилмайдиғанлиқимизни пүтүн дуня билсиму, хитай һөкүмити йәнила бизни бөлгүнчилик билән әйиблимәктә" дегән.