Daniyining xitayda turushluq bash elchisi pétérsén Uyghur ilini ziyaret qildi

Daniyining xitayda turushluq bash elchisi fris arné pétérsén yéqinda Uyghur aptonom rayonini ziyaret qilip, yerlik emeldarlar bilen söhbet élip barghan we rayondiki daniye karxanilirini yoqlighan.
Muxbirimiz erkin
2011-03-25
Share

Pétérsén 16-mart küni bashlan'ghan 5 künlük ziyaritide ürümchidin sirt yene, qarimay we qeshqer sheherlirini qilip, qeshqerde Uyghur medeniyitining özgichilikini körüshke muyesser bolghan.

U daniye metbu'atlirigha bergen bu heqtiki melumatida "Shinjang nurghun riqabetke duch kéliwatqan bolsimu, lékin shuning bilen birge nurghun pursetke ige. Bu rayon daniye shirketlirini zor soda pursiti bilen teminleydu. Shinjang medeniyitining özgichiliki kishini hayajan'gha salidu" dégen.

Pétérsénning ziyariti 5-iyul weqesidin ziyankeshlikke uchrashtin qorqup yawropa ellirige qéchip chiqip panahliq tileydighan Uyghurlar üzlüksiz köpiyiwatqan, daniye Uyghurlar siyasiy panahliq tileydighan asasliq yawropa ellirining biri bolup qalghan bir weziyette élip bérilghan idi.

Uning üstige, bu ziyaret yawropa parlaméntining yéqinda qarar maqullap, xitay hökümitidin qeshqerni chéqishni toxtitishni telep qilghan we yawropa komissiyisini xitaygha bésim ishlitishke chaqirghan bir mezgilge toghra kelgen idi.

Bash elchi pétérsén, 17-mart küni Uyghur aptonom rayonining mu'awin re'isi küresh meqsut bilen körüshken bolup, rayonning iqtisadi tereqqiyati, xitayning gherbni échish siyasiti we aptonom rayonning siyasiy tereqqiyatigha da'ir mesililerni sözleshken. Lékin, her ikki dölet metbu'ati bash elchining ziyariti heqqidiki xewerliride, ularning aptonom rayonning siyasiy tereqqiyatigha da'ir qandaq mesililerni sözleshkenliki heqqide ilgirilep melumat bermigen.

Daniye metbu'atlirining xewerliride bash elchi pétérsénning ziyaritining, yerlik emeldarlar bilen bolghan munasiwetni kücheytip, ziyaliylar we oqughuchilar bilen uchrishishni algha sürüsh, daniyining soda menpe'itini qoghdash, ammiwi jem'iyetler we programmilargha ilham bérishni meqset qilidighanliqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet