Қудрәтлик илаһ христиан тәшкилатиниң икки әзаси қарамайда қолға елинған

Хитай даирилири хитайдики "қудрәтлик илаһ" христиан тәшкилати әзалириға қаратқан тутқун қилиш һәрикитиниң даирисини кеңәйтти. Бүгүн хитай ахбарат васитилири һазирғичә бу тәшкилатқа әзалиридин 1000 кишиниң қолға елинғанлиқини елан қилди.
Мухбиримиз ирадә
2012-12-20
Share

Игилинишичә, бу кишиләр 12-айниң 21-күни ахирқи заман болидиғанлиқини илгири сүрүп, кишиләрни динға ишинишкә, барлиқ начар ишлардин қол үзүшкә чақирған вә шундақ қилғандила аман-есән қалидиғанлиқини ейтқан. Хитай даирилири бу тәриқәт әзалириниң питнә-пасат тарқитип, җәмийәт аманлиқини бузуш вә ахирқи заман сәпсәтиси билән кишиләрни алдам халтисиға чүшүрүш билән әйиблимәктә. Әмма бүгүн б б с елан қилған хәвәрләрдин қариғанда, бу кишиләрниң намайишлирида һәм шундақла тарқатқан тәшвиқ вәрәқилиридә коммунизмға қарши туруш, парихор әмәлдарларға қарши турушқа охшаш чақириқларниңму йәр алғанлиқи мәлум болмақта.

Бүгүн йәнә хитай хәвәрләр ториниң хәвәр қилишичә, чаршәнбә күни ахшам уйғур елиниң қарамай шәһиридиму мәзкур христиан тәшкилатиниң икки әзаси қолға елинған. Игилинишичә, қарамайда бу йил ичидә қудрәтлик илаһ тәшкилати әзаси болған җәмий 10 киши қолға елинған болуп, уларниң бири үстидин дело турғузулған, 3 си тутуп турулған вә 6 киши тәрбийиләш курсиға әвәтилгән.

Хитай даирилири бу христиан тәшкилати һәққидә очуқ вә тәпсилий мәлумат бәрмисиму, әмма бу тәшкилатниң 1990-йилларда алди билән хенән өлкисидә қурулғанлиқи вә наһайити кәң йилтиз тартқанлиқи билдүрүлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт