Хотәндә қанунсиз диний паалийәтләргә зәрбә бериш намида уйғурлар тутқун қилинди
2012.02.21
Хотән һөкүмәт тор бети хәвиридә, бу қетим хотәндә қанунсиз диний паалийәт билән шуғулланған 1400 киши тәкшүрүлгәнлики хәвәр қилинди. Әмма дуня уйғур қурултийи баянатчиси дилшат ришитниң билдүрүшичә, хотәндә бу 1400 кишидин башқа, уларниң аилә тавабиатлири қошулуп, тәхминән 3000 дин артуқ кишигә җәриманә қоюлған. 200 Орундики мәсчит тәкшүрүлгән.
Уйғур аптоном район даирилири 13-феврал күни ши җиңпиңниң америка зиярити мәзгилидә, район тәвәсидә қанунсиз диний паалийәтләргә зәрбә бериш һәрикити елип баридиғанлиқини уқтурған болуп, дуня уйғур қурултийи баянатчиси дилшат ришитниң билдүрүшичә, бирнәччә күндин буян үрүмчидә елип берилған “қанунсиз диний паалийәтләргә зәрбә бериш” намидики бастурушта, тәңритағ районидики 2 мәсчит “қанунсиз диний паалийәт соруни” дегән намда тақиветилип, 3 киши қолға елинған. Ундин башқа қәшқәр, хотән, ақсу қатарлиқ җайлардин үрүмчигә келип тирикчилик қиливатқан 40 тин артуқ адәм җинайәт өткүзмигәнлик испати беҗирмигән дегән баһанидә тутқун қилинған.
Мәлум болушичә, бу қетим хотәндә елип берилған “қанунсиз диний паалийәтләргә зәрбә бериш” намидики тутқун қилиш һәрикити, 1-айниң 23-күни йүз бәргән тибәтләрниң наразилиқ һәрикитидин кейин башланған. Хитай вәзийитини көзәткүчиләр бу һәқтә тохтилип, нөвәттә хитай һөкүмитиниң тибәттә йүз бәргән наразилиқ һәрикәтлиридин кейин, уйғур районида охшаш вәқәләрниң йүз беришидин әнсирәватқанлиқини илгири сүрмәктә.