Дуня мусулманлар иттипақи уйғур ели қатарлиқ районларда зиярәттә болған

Хитай һөкүмитиниң орунлаштуруши билән дуня мусулманлар иттипақи 9 - өктәбирдин 15 - өктәбиргичә уйғур ели қатарлиқ районларда зиярәттә болған.
Мухбиримиз җүмә
2010-10-16
Share

Шинхуа ахбаратиниң хәвәр қилишичә, мәзкур өмәккә дуня мусулманлар иттипақиниң баш катипи абдуллаһ бин абдулмоһсен әл – түрки баш болуп кәлгән. Улар бейҗиң, уйғур ели вә гәнсуларда зиярәттә болған.

Уйғур көзәтчиләрниң қаришичә, хитай һөкүмити уйғур елидә “ җуңхуа миллити еңини күчәп тәшвиқ қиливатқан пәйткә тоғра кәлгәнлики үчүн мәзкур зиярәт шүбһилик икән.

Хәвәргә қариғанда, улар үрүмчи вә қәшқәрләрдә мәсчитләрни көргән вә мәхмут қәшқириниң мәқбәрисини тавап қилған.

Һалбуки, әл түрки хитай зияритидин кейин, хитай һөкүмитиниң хитайдики“мусулман аз санлиқларниң диний етиқад әркинлики вә иҗтима’ий орнини қоғдашта көрсәткән тиришчанлиқиға гуваһчи болғанлиқини илгири сүргән.

Явропада яшаватқан бир диний зиялийниң қаришичә, әл - түркниң ейтқанлири уйғур елиниң нөвәттики вәзийитигә пүтүнләй уйғун әмәс икән. У мундақ деди: “"уйғурларда диний етиқад әркинлики йоқ дейәрлик. Уйғур елидә 17 яштин төвәнләр, һөкүмәт кадирлири, һәтта 17 яштин юқири мәктәп оқуғучилириниңму динға етиқад қилиши чәкләнгән. Буни қандақму уйғур хәлқи диний етиқад әркинликидин толуқ бәһримән болмақта дегили болсун?"”

Бу диний затниң қаришичә, хитай һөкүмитиниң дуня мусулманлар иттипақини уйғур елигә зиярәткә елип келиши бир сиясий алдамчилиқтин ибарәт икән.

Америка дөләт мәҗлисиниң хитай ишлар иҗра’ийә комитети алдинқи күни елан қилған йиллиқ доклатидиму уйғур ели кишилик һоқуқ вәзийитиниң бу йил техиму начарлашқанлиқини илгири сүрүлгән иди.
 
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт