Béyjingda öyi chéqilghan erzdarlar bilen saqchilar toqunushti
2011.11.29
Béyjingdiki erzdarlardin radi'omiz ziyaritini qobul qilghan bireylenning bildürüshiche, düshenbe küni etigen béyjingdiki öyi chéqiwétilgen 180 nechche erzdar hem tyenjindin kelgen 170 nechche erzdar, xitay döletlik erziyet idarisi aldida yighilip naraziliq bildürgen.
Da'iriler weziyetni kontrol qilish üchün yüz nechche saqchini neq meydan'gha ewetken. Saqchilar erzdarlarni tarqilip kétishke mejburlighanda, erzdarlar bilen saqchilar otturisida toqunush yüz bérip, 4 neper erzdar neq meydanda tutup kétilgen. Bir qisim tyenjinlik erzdarlar mejburiy halda tyenjin'ge qayturup kétilgen.
Radi'oyimizning bügün etigen igiligen uchuridin melum bolushiche, bu 4 neper erzdar namayish qiliwatqan erzdarlarning bésimi netijiside seyshenbe küni etigen qoyup bérilgen.
Yene bashqa uchurlardin melum bolushiche, seyshenbe küni etigen béyjing hem tyenjindiki herbiydin qaytqan eskerlerdin 100 nechche kishi béyjingdiki azadliq armiye bash shtabigha kélip, öz turmushini orunlashturushni telep qilip naraziliq namayishi qilghan.
Xitay hökümiti yerlik da'irilerdin erzdarlar mesilisini öz jayida hel qilishni telep qiliwatqan bolsimu, emma yerlik da'irilerdin razi bolghudek jawabqa érishelmigen erzdarlar yenila béyjinggha köplep kéliwatqini üchün, nöwette erzdarlar mesilisi béyjing da'irilirining béshini qaturuwatqan jiddiy mesililerning biri bolup qalghan.