Уйғур елидә мәлум болған әйдизләр 40миңға йәтти

Уйғур елидә чиқидиған мәтбуатларниң аптоном районлуқ сәһийә назаритидин игиләп тарқатқан хәвиригә қариғанда, уйғур елидә бу йил сентәбиргичә тизимға елинған әйдиз юқумдарлириниң сани 40 миңға йәткән болуп, 5073 киши әйдиз кесили билән өлгән.
Мухбиримиз гүлчеһрә
2012.11.30

Мутәхәссисләр адәттә әйдиз юқум санини, байқалғанлар санини 6 һәссиләш арқилиқ тәхминләйду. Уйғур елидә һазир әйдиз вируси тарқалмиған бирму наһийә, йеза қалмиған.

Әйдиз вируси уйғур елидә тунҗи қетим 1995-йили қумулға кәлгән бир хитай көчмәндин байқалған иди.

Сәһийә назаритидики мунасивәтлик хадимларниң билдүрүшичә, йеқинқи йиллардин тартип уйғур елидики әйдиз тарқилишиниң зәһәр чәккүчиләр вә әйдиз юқуш еһтималлиқи күчлүк кишиләр топидин башқа адәттики кишиләр арисиғиму тез тарқилиши вә юқуш йоллириниң көп хиллишиши уйғур ели әйдиз юқум вәзийитиниң җиддийликини көрситидиған болуп, буниң билән әйдиз ниң тарқилишини контрол қилиш ишлири уйғур елидә техиму зор риқабәткә дуч кәлмәктә икән.

1-Декабир 25-нөвәтлик дуня әйдиз күни мунасивити билән хитай сәһийә министирлиқиниң елан қилған доклатиға қариғанда, хитайда өктәбирниң ахирғичә тизимға елинған әйдизләр 500миң нәпәргә йеқинлашқан, әйдиз юқумдарлири сани бултурқидин 12.7% Өрлигән. Хитайда әр җинслиқлар арисида, өз-ара җинсий мунасивәт арқилиқ юқтурувелиш әйдиз вирусиниң асаслиқ тарқилиш йоли болуп қалған, һазирғичә байқалған әйдизләрниң 21% и мушу хил йол арқилиқ юқтурувалғанлиқи мәлум болған. Хитайда әйдиз тарқилиши җиддий болуватқан 9 өлкә вә аптоном районлар ичидә уйғур ели-5 орунда туриду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.