Ezerbeyjan chet'el metbu'atlirining ezerbeyjanda anglitish bérishini chekligen

Amérika tashqi ishlar ministirliki ezerbeyjan da'irilirining mezkur qararini " ezerbeyjanning démokratik islahatidiki tosalghu" dep tenqid qilghan. Ezerbeyjan döletlik radi'o - téléwiziye komitétining qarari 1 ‏ - yanwardin bashlap resmiy yolgha qoyulidighan bolup, mezkur qarar dölet kontrolliqidiki metbu'atlarning manapoliyilik ornini tiklep, musteqil axbarat wastilirining ezerbeyjan xelqini uchur bilen teminlishige tosalghu yaritidu, dep qaralmaqta.

Erkin yawropa radi'osining mes'uli jéfréy gédmin ezerbeyjan da'irilirining chet'el axbarat wastilirining anglitishini toxtitish toghrisidiki qararigha qayturghan inkasida " bu buningdin kéyin erkin we musteqil metbu'at uchurlirini angliyalmaydighan ezerbeyjan xelqi üchün köngülsiz bir kün boldi" dep tekitligen.

Azerbeyjanning ezaliqidiki yawropa bixeterlik we hemkarliq teshkilati azerbeyjanning qararini tenqidlep, " bu éghir derijide keynige chékin'genlik" dégen. Jéfréy gédmin, ezerbeyjan radi'o - téléwiziye komitétining erkin yawropa radi'osi programmilirini qisqa dolqunda yaki intérnét arqiliq tarqitish teklipini ret qilip, " biz tingshighuchilirimizgha anglitish yolini tapimiz, bizning ezeri xelqini cheklimige uchrimighan xewer we uchur bilen teminlesh wezipimiz burunqigha qarighanda téximu muhim bolup qaldi " deydu.

Lékin ezerbeyjan sabiq sowét ittipaqi jumhuriyetliri ichide chet'el axbarat wastilirining anglitishini tosighan birdin - bir dölet emes. Yéqinda qirghizistan erkin yawropa radi'osi qatarliq axbarat wastilirining anglitishini bikar qilghan idi.