20 Dölet guruhining bashliqlar yighini sé'ulda échildi

Tereqqi qilghan we tereqqi qiliwatqan ellerdin qurulghan 20 dölet guruhining bashliqlar yighini peyshenbe küni jenubiy koriye paytexti sé'ulda chaqirildi.
Muxbirimiz erkin
2010-11-11
Élxet
Pikir
Share
Print

Amérika prézidénti obama bilen xitay dölet re'isi xu jintaw yighin jeryanida ayrim uchriship, xelq pulining kursini östürüshtin tartip, eqliy mülük hoquqini qoghdashqiche bolghan bir yürüsh mesililer üstide söhbet élip barghan.

Amérika tashqi ishlar ministirliqining xelq'ara ishlargha mes'ul mu'awin ministiri laél bréynardning eskertishiche, xu jintaw xitayning xelq puli kursini tengshesh jehettiki wedisini tekrarlighan we hazirghiche melum ilgirileshke érishkenlikini qeyt qilip, xitayning pul islahatini muqim qedem bilen algha süridighanliqini bildürgen.

Prézidént obama xitaydin amérika köngül bölidighan bezi négizlik mesililerni jümlidin eqliy mülük hoquqini qoghdashni telep qilghan. Xu jintaw bolsa xitayning yumshaq détal oghriliqidin saqlinish jehette qolgha keltürgen netijisini körsitip ötken.

Metbu'atlar, gerche ikki dölet rehbiri her qaysi sahelerdiki hemkarliqni kücheytishni tekitligen bolsimu, lékin xelq pulining kursi qatarliq achquchluq mesililerdiki pikir ixtilapi birlikke kelmigenlikini ilgiri sürmekte.

Xitay emeldarliri peyshenbe küni élan qilghan bayanlirida tereplerning chong mesililerdiki pikir ixtilapi yenila birlikke kélip bolalmighanliqini bildürgen. Obama amérika bilen xitayning dunyadiki ikki chong iqtisadi gewde bolush süpitide iqtisadi tengpungluqqa kapaletlik qilish mejburiyiti barliqini tekitligen.

Obama xu jintaw bilen körüshken shu küni yene, jenubiy koriyide turushluq amérika armiyisini közdin kechürgen idi. U amérika eskerlirining lagirini közdin kechürgende 1950‏ - yili partlighan koriye urushigha baha bérip, amérika armiyisining eyni chaghda bergen qurbanliqi jenubiy koriyining bügünki güllinishi we démokratiyisining asasini qurdi dégen. U yene, shimaliy koriyini yölünüshini özgertip, yadro qorallardin waz kéchishke, jenubiy koriye bilen birge tinchliq we güllinishtin behriman bolushqa chaqirghan.

Toluq bet