B d t xitay hökümitidin kishilik hoquq adwokati gaw jishingni qoyup bérishni telep qildi

B d t ning bir komitéti xitay hökümitidin iz-déreksiz yoqap ketken kishilik hoquq adwokati gaw jishingni qoyup bérishni telep qilip, uning dawamliq tutup turulushi xelq'ara qanunlargha xilap ikenlikini bildürdi.
Muxbirimiz erkin
2011.03.28

Xewerlerdin melum bolushiche, b d t ning iz-déreksiz yoqap ketkenlerni sürüshte qilish xizmet komitéti ötken yili 7‏-ayda diplomatik qanallar arqiliq xitay hökümitidin gaw jishingni qoyup bérishni telep qilghan. Lékin, mezkur xewer düshenbe küni “Derhal erkinlik” namliq bir xelq'ara qanun qoghdash teshkilatining torida élan qilindi.

Mezkur teshkilatning tor bétidiki xewerdin ashkarilinishiche, b d t xitay hökümitidin yene, bu ziyankeshlikni peyda qilghan seweblerni tüzitishni telep qilip, gaw jishingning tutup turulushi xelq'ara qanunlargha xilap ikenlikini, chünki gaw jishing özining tüp hoquqini qollan'ghanliqini, xitay hökümitining bu jehettiki xelq'ara ölchemlerge xilapliq qilghanliqini tekitligen.

Bu xewer b d t kishilik hoquq kéngishining ötken ay jenwede bashlan'ghan kishilik hoquq yighini 25‏-mart küni axirliship, ikki kündin kéyin élan qilin'ghan. Iz-déreksiz yoqap ketkenler mesilisi jenwediki yighinda muzakirige qoyulup, her qaysi eller we xelq'ara teshkilatlar teripidin munazire qilin'ghan idi. Yighinda bezi xelq'ara ammiwi teshkilatlar b d t din 5-iyul ürümchi weqeside iz-déreksiz yoqap ketken Uyghurlarning iz-dérikini qilishni telep qilghan.

Gaw jishing, xitaydiki tonulghan kishilik hoquq pa'aliyetchilirining biri bolup, u xitay asasiy qanunini islah qilish chaqiriqi hem falun'gong muritlirini öz ichige alghan qamaqtiki bezi diniy zatlarni aqlash ishlirigha qatnashqan idi.

U 2009‏-yili bir qétim iz-déreksiz yoqap kétip, xelq'ara jem'iyetning bésimida kéyinki yili 3‏-ayda qoyup bérilgen. Lékin u 2010 -yili 4‏-ayda yene iz-déreksiz yoqap ketkendin buyan, hazirgha qeder héchqandaq iz-dériki bolmighan idi. Gaw jishingning ayali buningdin bir kün burun nyu-york waqti gézitining yekshenbe künlük sanida maqale élan qilip, prézidént obamadin yoldishining qoyup bérilishige yardem qilishni sorighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.