Германийә хитайни кишилик һоқуқ вә аз санлиқларниң һоқуқиға һөрмәт қилишқа үндиди

Хитайда зиярәттики германийә ташқи ишлар министири гуйдо вестервелле җүмә күни хитай ташқи ишлар министири яң җечи билән көрүшүп, хитай даирилирини кишилик һоқуқ, тибәт вә уйғур қатарлиқ хитайлар аз санлиқ дәп қарайдиған милләтләрниң һоқуқиға һөрмәт қилишқа үндигән.
Мухбиримиз әркин
2010-01-15
Share

Шуниң билән биргә у йәнә, бу мәсилидики пикир ихтилапи икки тәрәпниң сода мунасивитигә тәсир йәткүзмәслики керәкликини тәкитлигән.

Бу вестервеллениң өткән йили 10‏ - айда германийә ташқи ишлар министири вәзиписигә олтурғандин бери тунҗи қетим хитайни зиярәт қилиши болуп, у хитай ташқи ишлар министири яң җйечи билән өткүзгән сөһбитидә хитайниң пикир әркинлики, кишилик һоқуқ, аз санлиқ милләтләрни қоғдаш мәсилисидики позитсийисидин әндишә қилидиғанлиқини билдүргән.

Ройтерс агентлиқиниң бу һәқтики хәвиридә әскәртишичә, вестервелле яң җйечи билән елип барған сөһбити һәққидә тохтилип, "германийә һөкүмитиниң кишилик һоқуқ вә пуқралар һоқуқиға һөрмәт қилишни абстракит нәрсә әмәс , бәлки конкрет нәрсә, дәп қарайдиғанлиқи"ни, уларниң йәнә "тибәт вә мәдәнийәт аз санлиқлирини қоғдаш мәсилисигә охшаш икки тәрәп арисида пикир ихтилаби мәвҗүт темилар үстидә музакирә елип барғанлиқи"ни тәкитлигән.

Вестервеллениң әскәртишичә, яң җйечи хитайниң интернет вә Google мәсилисидики позитсийисини чүшәндүргән болуп, яң хитайниң интернеткә һуҗум қилишқа қарши туридиғанлиқини, лекин хитай һөкүмитиниң иҗтимаий муқумлуқни қоғдаш, пуқраларниң җисмани вә писхологийилик зиянға учришиниң алдини елиш вәзиписи барлиқини билдүргән.

Google Ширкити йеқинда баянат елан қилип, хитай даирилириниң бесимиға учриғанлиқини, хитайниң Google архипиға кирип, өктичи шәхсләргә аит учурларни оғрилиғанлиқини, әгәр зөрүр тепилса хитайдики паалийитини тохтитидиғанлиқини җакарлиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт