Gérmaniye xitayni kishilik hoquq we az sanliqlarning hoquqigha hörmet qilishqa ündidi

Xitayda ziyarettiki gérmaniye tashqi ishlar ministiri guydo wéstérwéllé jüme küni xitay tashqi ishlar ministiri yang jéchi bilen körüshüp, xitay da'irilirini kishilik hoquq, tibet we Uyghur qatarliq xitaylar az sanliq dep qaraydighan milletlerning hoquqigha hörmet qilishqa ündigen.
Muxbirimiz erkin
2010-01-15
Share

Shuning bilen birge u yene, bu mesilidiki pikir ixtilapi ikki terepning soda munasiwitige tesir yetküzmesliki kéreklikini tekitligen.

Bu wéstérwélléning ötken yili 10‏ - ayda gérmaniye tashqi ishlar ministiri wezipisige olturghandin béri tunji qétim xitayni ziyaret qilishi bolup, u xitay tashqi ishlar ministiri yang jyéchi bilen ötküzgen söhbitide xitayning pikir erkinliki, kishilik hoquq, az sanliq milletlerni qoghdash mesilisidiki pozitsiyisidin endishe qilidighanliqini bildürgen.

Roytérs agéntliqining bu heqtiki xewiride eskertishiche, wéstérwéllé yang jyéchi bilen élip barghan söhbiti heqqide toxtilip, "gérmaniye hökümitining kishilik hoquq we puqralar hoquqigha hörmet qilishni abstrakit nerse emes , belki konkrét nerse, dep qaraydighanliqi"ni, ularning yene "tibet we medeniyet az sanliqlirini qoghdash mesilisige oxshash ikki terep arisida pikir ixtilabi mewjüt témilar üstide muzakire élip barghanliqi"ni tekitligen.

Wéstérwélléning eskertishiche, yang jyéchi xitayning intérnét we Google mesilisidiki pozitsiyisini chüshendürgen bolup, yang xitayning intérnétke hujum qilishqa qarshi turidighanliqini, lékin xitay hökümitining ijtima'iy muqumluqni qoghdash, puqralarning jismani we pisxologiyilik ziyan'gha uchrishining aldini élish wezipisi barliqini bildürgen.

Google Shirkiti yéqinda bayanat élan qilip, xitay da'irilirining bésimigha uchrighanliqini, xitayning Google arxipigha kirip, öktichi shexslerge a'it uchurlarni oghrilighanliqini, eger zörür tépilsa xitaydiki pa'aliyitini toxtitidighanliqini jakarlighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet