Xitayning gu'angdung ölkisi xuyju shehiride Uyghurlar bilen xitaylar arisida toqunush yüz bérip bir adem öldi

Peyshenbe küni etigen xitayning gu'angdung ölkisi xuyju shehiride xunenlik xitaylar bilen Uyghur tijaretchiler arisida toqunush yüz bérip, bir Uyghur tijaretchi öltürülgen, nurghun adem yarilan'ghan.
Muxbirimiz erkin
2010-12-03
Élxet
Pikir
Share
Print

Weqe xuyju shehirining xuyching rayoni meydi jenubiy yoli soda bazirining chiqish éghizida yür bergen. Igilishimizche, toqunush xunenlik tengzichiler bilen Uyghur tijaretchilerning yer talishish sewebidin kélip chiqqan. Lékin, xitay metbu'atlirining xewerliride jédelning kimning bashlighanliqigha da'ir tepsilatlar tilgha élinmighan bolup, saqchi terepning weqeni tekshürüwatqanliqi ilgiri sürülgen.

Bu weqe ötken yili gu'angdungning shyawgüen nahiyiside xitay ishlar Uyghur ishlemchilerge hujum qilip, az dégende 17 Uyghur ishchini urup öltürüsh weqesidin kéyin yüz bergen tunji zor kölemlik Uyghur-xitay toqunushidur.

Igilishimizche, toqunushta éghir yarilan'ghan bir Uyghur tijaretchi doxturxanigha élip bérilghandin kéyin hayatidin ayrilghan. Weqede yarilan'ghan qalghan 6 kishining ehwalining muqim ikenliki bildürülgen bolsimu, lékin ularning Uyghur yaki xitay ikenliki tilgha élinmidi. Xewerlerdin melum bolushiche, da'iriler mexsus délo guruppisi qurup, weqege chétishliq gumandarlarni izdeshke bashlighan. Lékin, saqchi terep iz ‏- dérikini qiliwatqan gumandarlarning Uyghur yaki xitay ikenliki melum emes. Xuyju shehiri we weqe yüz bergen jaydiki saqchixanilar muxbirimizning bu weqe heqqidiki so'allirigha jawab bérishni ret qildi.

Bu weqe nahayiti tézla merkizi gérmaniyidiki dunya Uyghur qurultiyining diqqitini qozghighan. Qurultay bayanatchisi dilshat rishit, xitay da'irilirining Uyghurlargha qaratqan bir tereplimilik qarilash herikiti xitay puqralirida Uyghurlargha qarshi keypiyatni kücheytip, Uyghur-xitay munasiwitining izchil jiddiylishishige türtke boluwatqanliqini bildürdi. U xitay da'irilirini ichkiridiki Uyghurlarning hayati, bixeterliki we mal - mülkige kapaletlik qilip, ulargha teng barawer mu'amile qilishqa, bu qétimqi weqening heqiqiy ehwalini ashkara élan qilishqa we ölgüchige tölem tölep, qatilni jazalashqa chaqirdi.

Toluq bet